VOV4.Bahnar – Đơ̆ng rŏng kơ tơgop kơ hrĕng tâ̆n ‘nhot, ƀum, plei ‘long xa tơgŭm kon pơlei tơ̆ tơring pơrang jĭ hơbuh hli kơ dôm dêh char găh pơbăh, lơ kon pơlei dêh char Đăk Nông pơtoi rei pơtăm ‘nhot vă tơgŭm ăn kon pơlei tơ̆ tơring pơrang jĭ hơbuh hli.  

Đơ̆ng rŏng kơ tơgŭm hloh 2 tâ̆n pro dô păng lơ ‘nhot, ƀum, plei ‘long xa, unh hnam Trịnh Văn Khởi, tơ̆ thôn Thuận Hải, xăh Thuận Hạnh, apŭng Đăk Song, dêh char Đăk Nông pơtoi rei pơtăm hloh 7 sao ‘nhot lơ kơloăi vă tơgŭm ăn kon pơlei tơring hơbuh pơrang jĭ tơnap tap. ‘Nhŏng Khởi ăn tơbăt, mă mŭk drăm unh hnam adoi ƀơm răm kơyuơ đơ̆ng pơrang jĭ mă lei kơplăh âu kon pơlei tơ̆ lơ tơring oei tơnap tap hloh, noh inh ‘meh atŭm jơhngơ̆m tơgŭm ăn đe yĕt tơnŏ đon bơnôh păng dăh hrôih găn hloh pơrang jĭ pơrăm: “Unh hnam tŏk bŏk oei choh teh lê̆ hoh vă pơtăm lơ hơdrĕch ‘nhot, ƀum xa vă tơgŭm ăn kon pơlei tơ̆ dôm tơring tơnap tap. Mưh pơrang jĭ pơdui đunh năr, kơdih po unh gô chă hơvơn đe ‘nhŏng oh, kon pơlei pơtoi rei pơtăm vă đơ̆ng rŏng kơnh pơtoi tơgŭm ăn dôm tơdrong ƀơm răm hlăm đơ̆ng pơrang jĭ hơbuh hli”.

Duh nhen thoi noh, yă Nguyễn Thị Năm, tơ̆ xăh Quảng Tâm, apŭng Tuy Đức đơ̆ng rŏng kơ hơvơn hloh 20 tâ̆n ‘nhot, ƀum, plei ‘long pơtruh tơgŭm ăn dôm dêh char ƀơm pơrang jĭ. Yă mơng teh vă rei pơtăm hloh  1 ha ‘nhot vă pơtoi đei lơ tơmam tơgŭm ăn kon pơlei tơring hơbuh pơrang jĭ: “Dang ei ‘nhot xa adoi khăi bơih, noh inh tŏk bŏk oei mơng thêm teh tơjê̆ kơ unh hnam, tơroh gơnơm đơ̆ng Jơnŭm Drăkăn tơlĕch jang pơtăm ‘nhot, tơh cove vă axong ăn ‘măng đơ̆ng rŏng kơnh đei lơ hloh. Inh kơchĕng, dôm tơdrong jang âu gô tơgop minh păh xek tơlang keh tơdrong erih ăn kon pơlei tơ̆ tơring pơrang jĭ hơbuh duh nhen ăn bơngai jang hin dơnuh”.

Tơ̆ tơring ataih yaih Đăk Som, apŭng Đăk G’long, tơring đei jê̆ 70% kon pơlei kon kông mă lei ăh kon pơlei tơ̆ plei tơm Hồ Chí Minh ƀơm tơnap tap yuơ pơm kiơ̆ pơkăp oei ataih băl lơ̆m tơpôl, rim bơngai hăt hot chă akŏm ‘nhot, ƀum plei pơtruh axong. Ƀok Bùi Ngọc Tân, Kơdră Anih vei lăng kon pơlei xăh Đăk Som ăn tơbăt, truh dang ei, kon pơlei lơ̆m xăh kơdih tơgŭm đei hloh 5 tâ̆n ‘nhot, ƀum plei ăn kon pơlei tơ̆ tơring pơrang jĭ hơbuh hli plei tơm Hồ Chí Minh. Lơ unh hnam hlôi pơtăm thêm dôm hơdrĕch ‘nhot vă pơtoi đei ‘nhot tơgŭm ăn tơring ƀơm pơrang jĭ: “Xăh Đắk Som noh tơring 3, tơring tơnap tap, mă lơ noh kon pơlei kon kông, unh hnam hin dơnuh, tơjê̆ hin dơnuh lơ hloh. Lơ̆m dôm xơnăm kơ âu, kon pơlei lơ̆m tơring hơnơ̆ng iŏk đei tơdrong tơgŭm găh hla bar hŏk, hơbăn ao, phe xŏng, ƀoh măm đơ̆ng dôm bơngai jang ‘mêm bơnat, duh nhen dôm anih jang ‘mêm bơnat đơ̆ng plei tơm Hồ Chí Minh. Ăh plei tơm Hồ Chí Minh tŏk bŏk ƀơm tơnap tap kơyuơ pơrang jĭ Covid-19 hơbuh hli, rim unh hnam, bơngai jang mă oei tơnap tap mă lei hăm đon bơnôh dơnưp tơgŭm dih băl hơdong prit, ‘nhot, ƀum plei vă đei tơmam pơtruh ăn plei tơm Hồ Chí Minh”.

Kơ hrĕng tâ̆n tơmam choh pơtăm, tơmam gĭt kăl nai tơgŭm ăn kon pơlei ƀơm răm đei chơ ‘nhăk, atŭm hăm lơ hơdrĕch ‘nhot pơtoi đei rei pơtăm jing đon bơnôh ‘mêm kơ eng đơ̆ng kon pơlei kon kông dêh char Đăk Nông tơrĕkt ơgŭm hăm tơring ƀơm pơrang jĭ hơbuh hli kơ dôm dêh char găh pơbăh hăm tơdrong hơpơi, pơrang jĭ dăh hrôih klaih, tơdrong erih vih xơđơ̆ng ‘lơ̆ng nhen đêl.

Lan chih păng pơre nơ̆r