VOV4.Bahnar – Hăm tơdrong ‘meh vă tơgŭm kon pơlei lơ̆m anih pơkăp oei tơklăh da ƀiơ̆ tơnap tap, kon pơlei kon kông tơ̆ dêh char Đăk Nông hlôi akŏm đei kơ hrĕng tâ̆n ‘nhot xa vă pơtruh ăn plei tơm Hồ Chí Minh păng dôm dêh char găh pơbăh, tơgop tang găn păng tơjră pơrang jĭ Covid-19.

‘Nhŏng K’Tư, oei tơ̆ tơring ataih yaih pơlei Sê Rê A, xăh Đăk Som, apŭng Đăk G’Long, dêh char Đăk Nông, ưh adrô̆ tơgŭm tôm kơsô̆ prit kơ unh hnam, mă oei chă lơ hơdrĕch ‘nhot bri  “kăp gĭt” kơ tơring pơtruh ăn kon pơlei dôm dêh char găh pơbăh tŏk bŏk pơm kiơ̆ pơkăp tơklăh oei pha kơyuơ pơrang jĭ pơm ăn. K’Tư ăn tơbăt: “Inh pơtruh minh tă prit păng dôm kơloăi ‘nhot nhen ‘nhot ƀum iĕ, ‘nhot ƀep. Tơ̆ tơring đei hơdrĕch ‘nhot kiơ noh unh hnam inh năm pĕ tơ̆ bri vă pơtruh ăn kon pơlei tơ̆ plei tơm. Khei năr truh, inh duh nhen unh hnam gô pơtoi tơgŭm ƀơr, tơƀăng pơle. Dang ei tŏk bŏk ăh pơyan tơƀăng pơle noh đei hloi tơƀăng pơle bri păng pơtăm, unh hnam inh pơtoi đei dôm tơmam drăm iĕ ioch noh vă pơtruh ăn kon pơlei tơ̆ plei tơm”.

Duh nhen thoi noh, tơ̆ tơring xơlam teh thôn Thuận Hải, xăh Thuận Hạnh, apŭng Đăk Song, unh hnam ‘nhŏng Trịnh Văn Khởi hlôi tơgŭm hloh 2 tâ̆n ‘nhot nhen pro, hla xơƀei lôm, prit, plei ƀơr ăn kon pơlei tơring hơbuh pơrang jĭ. ‘Nhŏng oei hơvơn kon pơlei lơ̆m pơlei đei yă kiơ tơgŭm mă noh, rim bơngai tơgop tŏ xĕt tơmam po pơm tơlĕch hăm tơdrong ‘meh vă tơgŭm kon pơlei tơ̆ tơring hơbuh pơrang găn hloh tơnap tap: “Unh hnam đei minh ƀar kơloăi ‘nhot, ƀum, plei pro găm, tôl, prit, plei ƀơr noh duh tơgŭm tôm. Lơ̆m dôm năr kơ âu ƀôh tơdrong erih roi tơnap tap bre klo hơkăn nhi atŭm băl chă hơvơn kon pơlei đei tŏ xĕt ‘nhot ƀum chă axong ăn kon pơlei tơring hơbuh pơrang jĭ. ‘Năr âu inh atŭm hăm đe ‘nhŏng oh năm iŏk prit, tơneh, ‘nhot sup lơ đei jê̆ 4 tâ̆n vă hơmet chơ ăh kơmăng âu hơ ‘nhăk ăn kon pơlei tơ̆ plei tơm Hồ Chí Minh păng Bình Dương”.

Tơ̆ xăh Đăk Búk So, apŭng xơlam teh Tuy Đức, dêh char Đăk Nông, kon pơlei duh tơgop, hơvơn đei hloh 30 tâ̆n ‘nhot, ƀum pơtruh ăn kon pơlei tơ̆ tơring hơbuh pơrang. Ƀok Nguyễn Văn Anh, Ƀĭ thư Đảng ủy, Kơdră Anih vei lăng kon pơlei xăh Đăk Búk So ăn tơbăt: “Tơring âu jing tơring xơlam teh, tơdrong erih kon pơlei oei lơ tơnap tap. Mă lei ƀơ̆t mă dôm anih jang kơpal, jơnŭm pơgơ̆r tơring chă hơvơn tơgop ‘nhot ƀum vang glơng tơnap tap hăm tơring hơbuh pơrang jĭ noh kon pơlei drơ̆ng lăp đon. Đei bơngai kơtă chơ ‘nhot, ƀum, plei ‘long xa truh anih vei lăng kon pơlei xăh, đei bơngai axong khul hơdruh tơdăm, đe drăkăn, bơngai jang mir năm truh kơtă tơ̆ pơgar vă pĕ ‘nhăk pơtruh vang glơng tơnap tap".

Mă Tây Nguyên duh oei tơjră hăm pơrang jĭ Covid-19 hơbuh hli, mă lei hăm đon bơnôh ‘mêm kơ eng, kơchĕng “minh găr pơngot hiot minh kơđŏng ăh phĭ”, kon pơlei kon kông tơ̆ âu kơchăng “axong por xŏng tơƀăng xa” hăm dôm tơmam drăm “hlôi đei lơ̆m pơgar” tơgŭm kon pơlei tơ̆ plei tơm Hồ Chí Minh tŏk bŏk oei pơm kiơ̆ pơkăp tơklăh oei ataih băl lơ̆m tơpôl vă găn hloh pơrang jĭ hơbuh hli hlơt âu.

Lan chih păng pơre nơ̆r