VOV4.Bahnar -  Hlŏh đơ̆ng chă mơ̆ng ‘măng apinh păng tơl nơ̆r apĭnh, mă kăl ‘măng tơl hơdăh đơng Thủ tướng Tĕh đak Phạm Minh Chính lơ̆m pơgê brei, năr 12/11, bơngai tăh hla Trần Mạnh Việt, Kơdră Khŭl bơngai ‘lŏ kră phương 3, pơlei tơm Đà Lạt, dêh char Lâm Đồng hlôi tơbăt sơđơ̆ng jơhngơ̆m găh dôm trong hơmet pơ ‘lơ̆ng păng atŏk tơ iung mŭk drăm-tơpôl, yak hlŏh jĭ hơbŭh Covid-19 mă Thủ tướng păng rim Khŭl kơdră tĕh đak tơl hơdăh păng pơma trŭh. Mă lei, bơngai tăh hla Trần Mạnh Việt ‘mĕh vă dôm trong jang au kăl đei tơlĕch jang kiơ mă hơdăh hlŏh, pơm lơ liơ mă ƀlep ăn rim tơring.

 – Bơngai tăh hla  Nguyễn Huỳnh, kang ƀô̆ pơdơh hưu oei tơ̆ kueng 7, phương Thắng Lợi, plei tơm Kon Tum, dêh char Kon Tum xơkơ̆t: Tơdrong apinh đơ̆ng rim bơngai tang măt ăn Kuôk hô̆i adoi oei lơ̆m dôm tơdrong mă kon pơlei tơrĕk truh. Găh tơl nơ̆r, tơblang đơ̆ng 4 Ƀô̆ trưởng: Y tê̆; Axong jang, Linh jĭ rơka păng Tơpôl; Pơtho Pơhrăm; Axong pơkăp jên jang duh nhen tơdrong pơm hơdăh đơ̆ng minh ƀar Anih jang Tơm, tơrĕk truh noh tơpăt, hơdăh păng gĭt kăl. Mă kăl, tơ̆ 'măng apinh tơl nơ̆r lơ̆m hop akŏm âu, nơ̆r pơtruh đơ̆ng Thủ tướng păng dôm Phŏ Thủ tướng hlôi pơm hơdăh lơ tơdrong kăp gĭt, xơkơ̆t tôm tơdrong, pơgơ̆r jang tơnăp, tơlĕch trong hơtŏk mŭk drăm – tơpôl kơ teh đak lơ̆m khei năr pơrang jĭ COVID-19 hơbuh hli. Ƀok Nguyễn Huỳnh tơbang tơdrong hmach bơnê kơ 'măng Apinh Tơl nơ̆r ăh 'măng hop akŏm păng tơdrong tơnăp lơ̆m pơgơ̆r jang đơ̆ng Khul Kơpal teh đak: “'Măng mă âu hơlen tơdrong apinh đơ̆ng dôm bơngai tang măt ăn Kuôk hô̆i hăm dôm Ƀô̆ trưởng, lăng atŭm inh ƀôh dôm Ƀô̆ trưởng adoi băt hơdăh tơdrong kơ po. Mă hăt noh dôm Ƀô̆ hlôi băt hơdăh lơ̆m tơdrong tơplih đơ̆ng pơrang jĭ COVID-19 pơm đei. Pơrang jĭ hlôi pơm ăn tơpôl hơlơ̆k hơle. Đơ̆ng mă pơrang hơbuh truh dang ei Khul kơpal teh đak hlôi đei dôm tơdrong tơplih trŏ ƀlep. Khul kơpal teh đak hlôi đei lơ trong pơkăp jang trŏ ƀlep hăm tơdrong đei truh. Inh ƀôh minh tơdrong atŭm noh Đảng, Teh đak, Khul kơpal hơnơ̆ng kơchĕng, tơrĕk păng chơ chă rim trong jang vă lơ̆m pơrang jĭ hơbuh âu pơm jang keh 2 tơdrong pơkăp noh tơjră răh pơrang jĭ păng hơtŏk răh mŭk drăm”.

Tơblơ̆ nơ̆r: Amazưt-Lan