VOV4.Bahnar - Yă Rơ Châm H’Déo (bơngai Jarai), sơ̆ jang Kơdră chĕp pơgơ̆r Dơnŏ anĭh Mặt trận Tổ quốc dêh char Gia Lai đei pơjao tơdrong jang chă rơ̆ih 9 dơnơm ‘long Tơngiơ đơ̆ng Tây Nguyên chơ ba năm tơ̆ Hà Nội vă pơtăm lơ̆m cham Pơsat Ƀok Hô. Năr pơm lê̆h pơtăm ‘long ƀơ̆t cham Pơsat Ƀok Hô jĭ tơdrong pơgơ̆r tôch gĭt kăl păng chhưu lơ̆m jơhngơ̆m đon kon pơlei rim hơdrung Gia Lai. Khŭl tang măt đei vă jê̆ 50 ‘nu kơ yuơ yă Rơ Châm H'Déo chĕp kơ̆l khŭl ‘nŏh đei rim kră pơlei, rim ƀok soi khŭl lui khop, tang măt ăn tôm rim hơdrung tŏk bŏk erĭh sa lơ̆m groi tĕh dêh char Gia Lai. Lơ̆m jơ ‘năr gĭt kăl, yă Rơ Châm H'Déo hlôi tang măt ăn kon pơlei rim hơdrung Gia Lai pơma tơbăt jơhngơ̆m đon hmach bơnê kơtang hăm tơdrong tơgop tĭh tên đơ̆ng Đảng, Ƀok Hô. Hlŏh 10 sơnăm, dôm dơnơm ‘long Tơngiơ tŏk bŏk tĭh vơ̆ jing ‘lơ̆ng, pơm yơ̆p rơngơp tơ jê̆ Pơsat Ƀok Hô, jing tơbăt ăn jơhngơ̆m đon nuih mơng đơ̆ng kon pơlei Tây Nguyên mĭnh jơhngơ̆m đon kiơ̆ Ƀok Hô, kiơ̆ Đảng. Năr au, năr 2/9, Tơbăt 76 sơnăm năr Quốc khánh, yă Rơ Châm H’Déo tơbăt jơhngơ̆m đon:“Năr 2/9/1945, Ƀok Hô đŏk Nơ̆r tơchơ̆t Tĕh đak pơm tơm kơ dĭh pơjing đei tĕh đak Việt Nam. Đơ̆ng năr ‘nŏh trŭh dang ei hlôi yak hlŏh 76 sơnăm bơih. Gơnơm đei rơngei keh kong kơna dang ei bơngai Jrai, Bahnar mă đei tơdrong erĭh sa phĭ tơtŏ dơnŏ ‘lơ̆ng. Đơ̆ng rŏng sơnăm 1945 trŭh sơnăm 1946 đei pơgơ̆r Pơm lê̆h hop akŏm rim hơdrung tĕh đak Việt Nam, vang kơrŭn jơhngơ̆m iung tơblăh Phalăng iŏk đei rơngei ăn hơdrĕch hơdrung. Kơtă tơ̆ Gia lai, kon pơlei bơngai Jrai, Bahnar, nhen Ƀok Hô hlôi pơma: “ Bơngai Yuăn dăh mă Thổ, Mường, Mán, Jrai, Bana, Êđê, Sedang jei ‘nhŏng ŏh pôm mĕ ƀă yă ƀok, kăl tơgoăt dĭh băl mĭnh ƀơ̆r đon, vang kơrŭn jơhngơ̆m iung tơblăh păng vei lăng tĕh đak kơ lu bơ̆n. Kơ yuơ lơ lŏh rim răih kon pơlei lơ̆m tĕh đak au jĭ ‘nhŏng ŏh ngăl, ư̆h kơ đei bu hơchăng hŭt tơ̆ rŏng, ư̆h kơ đei bu hơchăng hŭt, bơngai kră, bơngai jo jăn, bơngai tơnap tap jei tơgŭm djru păng tơ iung pơjing tĕh đak”.

Tơblơ̆ nơ̆r: Amazưt