VOV4.Bahnar - Tơ̆ dêh char Kon Tum đei 2 anih pơ tăm cao su tơ̆ apŭng sơ lam Ia H’Drai oei apinh pơ dreu dơ̆ng ăn dêh char vei lăng hlŏh 1.700ha tĕh adrol kơ ‘nŏh đe sư thuê vă pơ tăm cao su. 

Mă hơ dăh 2 anih jang apinh pơ dreu dơ̆ng hlŏh 1.700ha tĕh ăn dêh char Kon Tum ‘nŏh jĭ Công ty TNHH Một thành viên cao su Chư Mom Ray păng Công ty jang cao su Sa Thầy găh Grŭp jang Cao su Việt Nam ngăl. Lơ̆m nŏh, Công ty TNHH Một thành viên cao su Chư Mom Ray apinh pơ dreu dơ̆ng ăn dêh char 1.400ha păng Công ty jang cao su Sa Thầy ‘nŏh hlŏh 300ha.

Kiơ̆ kơ dră chĕp kơ̆l 2 anih jang âu, tĕh mă 2 anih jang apinh pơ dreu dơ̆ng ăn dêh char tơ tă groi kông tĕh tơ mo, tơ ter thong đak, tĕh krăi ưh lăp hăm tơ drong pơ tăm ‘long cao su. Kơ dră chĕp kơ̆l Công ty TNHH Một thành viên cao su Chư Mom Ray ăn tơ băt, kơ dră chĕp kơ̆l Grŭp jang Cao su Việt Nam păng kơ dră chĕp kơ̆l dêh char Kon Tum đĭ drơ̆ng nơ̆r ăn trong jang ‘nâu bơih.

Dơ̆ng: Tơ blơ̆