VOV4.Bahnar  – Pơgê năr 6/9, Anih vei lăng kon pơlei dêh char Kon Tum pơm lêh ‘nhăk Khul kang ƀô̆ y tê̆ kơ dêh char vang năm tang găn păng tơjră pơrang jĭ COVID-19 tơ̆ dêh char Bình Dương.

Kiơ̆ tơlĕch jang, Khul 30 ƀak sih, điu yương kơ dêh char Kon Tum gô năm jang tơ̆ dêh char Bình Dương lơ̆m 30 năr. Adrol kơ năm, rim bơngai lơ̆m Khul jang hlôi akŏm hŏk lăm pơhrăm lơ̆m 6 năr yuơ Anih jang Y tê̆ dêh char Kon Tum pơgơ̆r, akŏm lơ̆m tơdrong khăm hơlen; kih thuơ̆t iŏk đak muh, pham xet ngĭm SARS-CoV-2 hăm kih thuơ̆t Realtime PT- PCR. Pơma hơlêm đe ƀak sih, điu yương kơ dêh char adrol kơ yak jơ̆ng năm, ƀok Lê Ngọc Tuấn, Kơdră Anih vei lăng kon pơlei dêh char Kon Tum ‘meh vă: rim bơngai lơ̆m khul jang gô chĕp vei tơnăp tơdrong tơguăt tơguăl, xơnong jang, hơmet rim tơdrong tơnap tap lơ̆m tơdrong pơm jang, vei xơđơ̆ng jơhngơ̆m jăn păng vei xơđơ̆ng ăn kơdih po.

Vă hơlêm pơ ‘lơ̆ng đon bơnôh Khul lơ̆m tơdrong pơm jang tơ̆ dêh char Bình Dương, Anih vei lăng kon pơlei dêh char Kon Tum, Anih jang Y tê̆, Anih Axong jang kơ dêh char, Anih jang Cổ phần sâm Ngọc Linh Kon Tum hlôi axong ăn rim tơ ‘ngla păng Khul năm jang hơkŏp kơsô̆ jên hơpăh noh 285 trĭu hlj.

Lan chih păng pơre nơ̆r