VOV4.Bahnar – Hăm kơtơ̆ng găh tơdrong mă lơ kon pơlei plei tơm Hồ Chí Minh ưh kơ măh 'nhot xa lơ̆m dôm pơkăp oei tơklăh vă tơjră pơrang jĭ COVID-19, đơ̆ng pơgê 'năr brei (12/7), lơ Kâu lak ƀô̆, Khul jang 'mêm bơnat hăm kơ hrĕng 'nu vang jang tơ̆ dêh char Kon Tum hlôi akŏm 'nhot xa hăm tơdrong pơkăp ăh kơsơ̆ âu năr  (13/7) gô chơ 'nhăk pơhlom 10 tâ̆n 'nhot xa tơgŭm kon pơlei tơ̆ plei tơm.

          Jang atŭm pơm kiơ̆ tơdrong tơgŭm 'nhot ăn kon pơlei plei tơm Hồ Chí Minh, dôm Kâu lak ƀô̆, Khul jang 'mêm bơnat kơyuơ tơpôl tơ̆ Kon Tum tơlĕch chă akŏm đei pơhlom 10 tâ̆n 'nhot vă pơtruh ăn kon pơlei tơ̆ plei tơm. Atŭm hăm dôm kơloăi 'nhot 'măn xa hloi, nhen hla xơƀei, hla ƀăr, hla ngok... oei đei tôl, tơh gơh 'măn xa đunh năr. Kơdră Kâu lak ƀô̆ Inh 'mêm Kon Tum ăn tơbăt, tơdrong chă chơ păng axong 'nhot xa lơ̆m khei năr pơrang jĭ COVID-19 hơbuh hli hlôi đei hơlen pơkăp vei xơđơ̆ng ăn kơ 'nhot truh tơ̆ tơpang ti bơngai yua plei tơm gơh tenh hloh păng xơđơ̆ng hloh.

Lan chih păng pơre nơ̆r