VOV4.Bahnar - Ƀơm truh bơ ngai jĭ COVID-19 tơ̆ dêh char Dak Lak, pơ gê ‘năr (13/5) Anih vei lăng găh tơ drong jang pơ gang dêh char Kon Tum tơ băt, Anih vei lăng tơ drong jĭ jăn dêh char hlôi băt hơ dăh đei hơ nih mơ dro tơ mam lơ̆m pơ lei tơm Kon Tum, hơ nih bơ ngai jĭ COVID-19 kơ sô̆ 3237 dêh char Dak Lak pơ dơ̆ng gre ô tô răt tơ mam sa lơ̆m kơ plăh kơ dâu đơ̆ng pơ lei tơm Đà Nẵng brŏk tơ̆ pơ lei tơm Buôn Ma Thuột lơ̆m ‘năr 6/5/2021. 

Khŭl jang kơ pal dêh charKon Tum bơ̆ jang hăt hot trong jang tang găn jĭ tơ̆ Hơ nih tĕch mơ dro tơ mam Sen

Lăp đơ̆ng rŏng kơ băt hơ dăh đei hơ nih tĕch mơ dro tơ mam hơ nih F0 dêh char Dak Lak mơ̆t răt tơ mam sa, khŭl jang kơ pal dêh char Kon Tum hlôi pơ gơ̆r pơ vang găn, pơm kiơ̆ pruih pơ gang pơ đĭ hơ nih tĕch mơ dro tơ mam mă đei bơ ngai F0, F1 mơ̆t răt tơ mam, truh gơ măng ‘năr 12/5 pơ gơ̆r ba năm ăn oei hơ drô̆ akŏm 9 ‘nu F1. Hơ dai hăm ‘noh băt hơ dăh đei 202 ‘nu ‘noh F2 athei pơm kiơ̆ ăn oei hơ drô̆ tơ̆ hnam păng chih hơ năn răp hơ len lăng jơ hngơ̆m jăn 40 ‘nu ‘noh F3. Dang ei, jơ hngơ̆m jăn kơ dôm bơ ngai F1 sơ đơ̆ng, ư̆h kơ đei dôm tơ drong jĭ COVID-19. Pơ tôch hơ len lăng ‘măng mă 1 đơ̆ng Anih vei lăng tơ drong jĭ jăn dêh char Kon Tum ăn ƀôh 9 ‘nu F1 tă ư̆h kơ đei pơ rang jĭ SARS-CoV-2 ngăl.

Thuem: Tơ blơ̆