VOV4.Bahnar - Dêh char Kon Tum dang ei tŏk bŏk jang kiơ̆ ƀet bơ̆ng vaccine tang găn jĭ Covid-19 ‘măng mă 2 ăn 17.620 ‘nu bơngai găh khŭl kăl ăn ƀet bơ̆ng đĕch vaccine tang găn Covid-19 pơm kiơ̆ Tơdrong tơchơ̆t kơsô̆ 21 năr 26/2/2021 đơ̆ng Khŭl kơdră Tĕh đak.

Kŏng nhân tơ̆ Hơnĭh jang Kmăi kmŏk Hoà Bình, dêh char Kon Tum iung jang pơm tơlĕch tơmam drăm sơđơ̆ng ‘lơ̆ng tang găn jĭ Covid-19

Lơ̆m 17.620 ‘nu bơngai oei tơ̆ dêh char Kon Tum đei ƀet vaccine tang găn jĭ Covid-19 ‘măng mă 2 đei hlŏh 14.300 ‘nu bơngai găh rim khŭl tơm bơ̆ jang tang găn jĭ. Dôm bơngai đei ăn ƀet hơdrol đơ̆ng rŏng dơ̆ng ‘nŏh đei 46 ‘nu bơngai bơ̆ jang tơbôl, kang ƀô̆ bơ̆jang vei lăng mơ̆t lĕch hăm tĕh đak đe păng hlŏh 3.200 ‘nu bơngai găh khŭl pơtrŭh ăn rim tơmam drăm kăl. Vă sơđơ̆ng kĕ sĭt, sơđơ̆ng ‘lơ̆ng lơ̆m jơ ‘năr ƀet vaccine tang găn jĭ Covid-19 ‘măng mă 2, dơnŏ anĭh vei lăng jang pơgang dêh char Kon Tum klăh asong dôm bơngai kăl ăn ƀet hơdrol păng pơgơ̆r ƀet 2 ‘măng. ‘Măng mă 1 đơ̆ng năr 7/6/2021 ƀet jrŭm mă 1 ăn 7.780 ‘nu bơngai. ‘Măng mă 2 iŏk đơ̆ng năr 5/7/2021 ƀet jrŭm mă 2 ăn 9.840 ‘nu bơngai hlôi ƀet jrŭm mă 1.

Tơblơ̆ nơ̆r: Amazưt