VOV4.Bahnar - Lơ̆m drơ̆m kơ sơ̆ ‘năr 7/10 tơ̆ hơ nih dơ nâu đak hnam kơ măy pơm tơ lĕch unh điên Plei Krông, găh thôn 3, xăh Hà Mòn, apŭng Đăk Hà, dêh char Kon Tum hlôi đei ƀôh 1 ‘măng blơ̆ thŏng nan pơm ăn 2 ‘nu hiong dong. Kiơ̆ kơ tơ̆ng ang đơ̆ng Anih vei lăng kon pơ lei xăh Hà Mòn, apŭng Đăk Hà, lơ̆m kơ ‘năr dơ̆ng atŭm lơ̆m năr đei 1 grŭp 7 ‘nu tơ dăm pơ gơ̆r hao thŏng nan năm văh ka tơ̆ hơ nih âu păng pơ gơ̆r et sa tơ̆ âu. Truh hơ tuch jơ kơ sơ̆ grŭp đe tơ dăm âu hao thŏng an tŏk tơ̆ pơ nơ̆ păng đei 4 ‘nu brŏk hơ drol.

Khŭl linh tơ chă dŏng sar bar vang tơ chă bơ ngai răm

3 ‘nu uơ oei dơ̆ng yua đơ̆ng đei bơ ngai lê̆ hiơt điên thoăi kơ na hao thŏng nan năm tơ chă hơ lơ̆k dơ̆ng. Ƀơ̆t thŏng nan hơ tăih kơ pơ nơ̆ dang 30m ‘noh ưh kơ ê đei blơ̆ păng lăp 1 ‘nu lơ̆m kơ sô̆ âu gơh glơi tŏk tơ̆ pơ nơ̆, 2 ‘nu oei dơ̆ng hiong dong. Đơ̆ng rŏng kơ sơng iŏk đei tơ roi găh tơ drong glơ̆k kơ đak, khŭl kơ dră xăh Hà Mòn, apŭng Đăk Hà hlôi hơ vơn hloi khŭl jang kơ tă anih păng jang hơ dai hăm khŭl linh Kŏng an pơ gơ̆r tơ chă bơ ngai răm. Truh 12 jơ ‘năr brei, kơ tơ̆ng ang đơ̆ng hơ nih âu ăn ƀôh khŭl linh dŏng tơ gŭm oei tam mă chă ƀôh hơ kâu bơ ngai răm.

Thuem: Tơ blơ̆