VOV4.Bahnar - Phŏ Kơ dră Anih vei lăng kon pơ lei dêh char Kon Tum Y Ngọc hlôi bơ̆ jang hăm kơ dră chĕp kơ̆l apŭng Kon Plông păng xăh Măng Cành găh dôm bơ ngai jĭ pơ ngŭl tơ mam sa tơ̆ xăh Măng Cành. Tơ̆ jơ bơ̆ jang, Anih vei lăng găh jang pơ gang tơ băt hlôi pơ gơ̆r iŏk pham, hăk gơ̆ih kơ anih jang kơ pal hơ len lăng tơ chă tơ drong tơm pơm ăn jĭ, jang hơ dai hăm tơ ring krao hơ vơn kon pơ lei hŭt lê̆ tơ mam jâu đei pơ rang jĭ. Hăm dôm bơ ngai đei jĭ, anih jang pơ gang hơ len lăng jâu đei ƀơm pơ nhŭl Clostridium botulinum  păng tŏk bŏk hơ drin hơ met ăn dôm bơ ngai jĭ. Phŏ kơ dră Anih vei lăng kon pơ lei dêh char athei apŭng Kon Plông lăng kăl tơ roi tơ băt jơ̆p jang ăn kơ kon pơ lei hlôh găh tơ drong jĭ ‘nŏh jĭ yua đơ̆ng pơ nhŭl tơ mam sa, ư̆h kơ lê̆ pơm ƀơm ư̆h kơ ‘lơ̆ng truh sơng iŏk tơ moi tơ mang lăng kơ apŭng hơ dai hăm ‘noh athei anih jang pơ gang tơ tĕnh hơ len lăng, băt hơ dăh tơ drong tơ pŏh jĭ, hơ met ăn dôm trong jang vă tơ jră hăm tơ drong mư̆h đei lơ bơ ngai vang đei pơ nhŭl, hơ dai hăm tơ lĕch jang dôm trong jang vei sơ đơ̆ng tơ mam sa rơ gŏh ‘lơ̆ng lơ̆m ‘măng pôk rơ̆ih vă jê̆ truh.

Thuem: Tơ blơ̆