VOV4.Bahnar - Dêh char Kon Tum hơnơ̆ng ƀô̆h dơ̆ng 12 ‘nu bơngai F0 păng 13 ‘nu bơngai tơpŏh hơlơ̆k dơ̆ng sơmach jĭ SARS-CoV-2, dôm bơngai au jei dôm bơngai jang đơ̆ng pơlei tơm Hồ Chí Minh păng rim dêh char: Đồng Nai, Bình Dương, Bình Phước vĭh tơ̆ dêh char.

Kon pơlei tơroi tơbăt jơhngơ̆m jăn tơ̆ Hơnĭh gak mă 1 Sao Mai, pơlei tơm Kon Tum.

Rim bơngai F0 au đe sư oei tơ̆ 4 apŭng kơ dêh char Kon Tum ‘nŏh: Ngọc Hồi, Sa Thầy, Đak Tô, Đak Hà păng đei ăn oei hơdrô̆ mư̆h brŏk truh tơ̆ dêh char. Găh 13 ‘nu bơngai tơpŏh hơlơ̆k dơ̆ng đei ƀô̆h lơ̆m năr 7/10 tơ̆ dêh char Kon Tum jei brŏk đơ̆ng pơlei tơm Hồ Chí Minh păng dêh char Bình Dương. Lơ lŏh đơ̆ng năr 5-7/10, Dơnŏ anĭh jang pơgang dêh char Kon Tum hlôi ƀô̆h 16 ‘nu bơngai F0 păng 25 ‘nu bơngai tơpŏh hơlơ̆k dơ̆ng sơmach jĭ SARS-CoV-2. Dêh char Kon Tum oei jing dêh char kăl hlŏh tơ̆ tơring Tây Nguyên tim mă đei bơngai ayơ tơpŏh lơ̆m kon pơlei.

Tơblơ̆ nơ̆r: Amazưt