VOV4.Bahnar - Lơ̆m 9 khei au ki, Kon Tum ‘nŏh dêh char hơvơn tơmơ̆t jên jang ‘ngoăih kon jên tĕh đak tŏ sĕt hlŏh pơtêng hăm rim dêh char lơ̆m tơring Tây Nguyên. Tơ̆ hơnăp tơdrong au, tơ̆ hop akŏm ‘măng mă 5 Khŭl kơdră chĕp pơgơ̆r Đangr dêh char jăl XVI ‘nao đei pơgơ̆r giĕng au ki, Dơnŏ anĭh Đảng dêh char Kon Tum hlôi akŏm pơma dơnŭh vă tơchă ƀô̆h tơdrong tơhlăk tơhlĭn, tơchă trong vă hơvơn tơmơ̆t jên jang.

Thoong đak tŏ Đak Tô lơ sơnăm hơchăng hơchar hơngol gôchang bơngai tơmơ̆t jên jang

Lơ̆m 9 khei au ki, dêh char Kon Tum hơvơn đei 28 tơdrong vă jang hăm akŏp kon jên apĭnh tơmơ̆t jang hlŏh 8.000 ti hlak jên, mă lei đĭ đăng oei lơ̆m tơmơ̆t jên jang lơ̆m hla bơar đĕch. Mă hơdăh, hrei au ‘nao lăp đei 2 tơdrong vă jang đei tơmơ̆t jang pơm tơlĕch tĕch mơdro tơmam drăm hăm akŏp kon jên tơmơ̆t jang hlŏh 10 ti hlak jên, 5 tơdrong vă jang tŏk bŏk tơlĕch jang tơmơ̆t jên jang hăm akŏp kon jên 24 ti hlak jên păng găh lơ 21 tơdrong vă jang oei tŏk bŏk lơ̆m pơm pơkeh hla bơar. Kiơ̆ đơ̆ng ƀok Ngô Việt Thành, Kơdră chĕp pơgơ̆r Dơnŏ anĭh Pơprŏ tơdrong jang păng Tơmơ̆t jên jang dêh char Kon Tum, mĭnh hơnĭh tơhlăk tơhlĭn hlŏh lơ̆m hơvơn tơmơ̆t jên jang ‘noh tơdrong đei ƀơm trŭh groi tĕh:“Vă jê̆ 90% tơdrong vă jang đei ƀơm trŭh groi tĕh ‘nŏh jei đei tơdrong glăi anai ƀar păh trong pơ prŏ vă jang 3 kơ loăi bri hăm đei ƀô̆h groi tĕh hrei au ‘nŏh hơdrom dĭh băl lơ̆m tơdrong drơ̆ng nơ̆r tơmơ̆t jên jang. ‘Ngoăih kơ ‘nŏh, mĭnh ƀar tơdrong vă jang athei tơdrong pơ prŏ atŏk tơ iung mŭk drăm tơpôl dăh mă pơ prŏ groi tĕh ư̆h kơ ƀlep hăm nơ̆r chă apĭnh đơ̆ng bơngai tơmơ̆t jên jang. Đơ̆ng nŏh mĭnh ƀar Dơnŏ anĭh vei lăng kon pơlei apŭng, pơlei tơm mư̆h tơ ƀô̆h groi tĕh jei ư̆h kơ dăr lăng hơlen trŭh bơngai tơmơ̆t jên jang pơm hla bơar ‘nŏh đei trong tơhlăk, hơdrom dĭh băl hăm rim tơdrong vă jang hlôi đei hơmet ăn vă jang păng hơdrom  hăm rim tơdrong vă jang hlôi đei ăn asong tơmơ̆t jang dăh mă ưh kơ ƀlep hăm trong pơ prŏ atŭm”.

Pơtăm păng pơm tơlĕch ‘long pơgang mĭnh trong jang dêh char Kon Tum krao hơvơn tơmơ̆t jên jang

Atŭm hăm dôm tơdrong kơpal, dôm tơdrong tơhlăk tơhlĭn dơ̆ng lơ̆m hơvơn tơmơ̆t jên jang tơ̆ dêh char Kon Tum jei đei tơ ƀô̆h hơdăh lơ̆m bơ̆ jang ư̆h kơ ‘lơ̆ng hơ iă tơdrong jang vei lăng đơ̆ng rim hơnĭh bơ̆ jang. Mă hơdăh nhen ư̆h rơhăo lơ̆m ăn asong tơgop nơ̆r hơlen hơdăh pơm ăn đei ƀơm kơnê̆ trŭh tơdrong jang ‘lơ̆ng, khei jang kơ rim tơdrong vă jang tơmơ̆t jên jang; Rim tơring tim mă jang ‘lơ̆ng hơnăp jang dăr lăng, lăng hơlen tơmơ̆t jên jang vă tơtom băt hơdăh, hơmet pơ ‘lơ̆ng tơnap tap ăn bơngai tơmơ̆t jên jang; Ư̆h kơ jang kơ jăp lơ̆m băr păh iung jang tơmơ̆t jên jang kơ rim tơdrong vă jang. Tơbăt hơdăh dôm tơdrong jang tim mă gan ‘lơ̆ng kơ dêh char lơ̆m tơdrong hơvơn tơmơ̆t jên jang, Kơdră jang lơ̆m Trung ương Đảng, Bí thư Đảng dêh char, Kơdră chĕp pơgơ̆r Dơnŏ anĭh vei lăng kon pơlei dêh char  Kon Tum Dương Văn Trang lăng kơ jăp trŭh hơnăp jang păng sơnong jang kơ bơngai kơdră chĕp pơgơ̆r hăm athei kăl tơplĭh hloi: “Bơ̆n pơma atŭm lơm au đei mĭnh, ƀar pêng ‘nu kơdră jang tim mă tơnăp păng tim mă hơbĕch hơbăl dôm tơdrong jang atŭm kơ dêh char, kơ yuơ kơ kon pơlei. Lơ̆m pơkăp găh hơlen hơdăh tơdrong bơ̆ jang hơbĕch hơbal tơnăp kơ bơngai kơdră chĕp pơgơ̆r. ‘Nŏh dêh char jei chĕp pơgơ̆r, hơnĭh jang jei chĕp pơgơ̆r, twodrong chĕp pơgơ̆r kơ hơnĭh jang. Găh bơ̆n đe trŭh ‘noh tơ ƀơ̆p, đe ư̆h kơ truh ‘nŏh lê̆, ư̆h kơ kăl. Hơnĭh mơdro sa đe sư pơma ư̆h kơ kăl ‘nŏh lê̆, mư̆h lơ lŏh dơnŭh hơnơ̆ng mŭk drăm tơpôl ư̆h kơ kĕ atŏk tơ iung ôh”.

Atŭm hăm ƀô̆h hơdăh dôm tơdrong tơhlăk tơhlĭn, hơdrin tơ iung pơjing trong jang tơmơ̆t jên jang hơdăh, tơpăt, rơvơn păng hơbĕch hơbal vă hơvơn đei đe tơmơ̆t jên jang, mĭnh tơdrong dơ̆ng jei tŏk bŏk đei dêh char Kon Tum tơlĕch jang kiơ̆ kơtang, ‘nŏh dăr lăng, ư̆h kơ ăn hloi rim bơngai tơmơ̆t jên jang ư̆h kơ ‘lơ̆ng, tơmơ̆t jên jang kiơ̆ trong vă tĕch tơnô̆ jang ăn hơnĭh anai jang vă đei sa hơpăh.

Bơngai chĭh: Khoa Điềm

Tơblơ̆ nơ̆r: Amazưt