VOV4.Bahnar - ‘Năr dơ̆ng 21/10, 1 ‘nu hŏk tro lăm 12C2, hnam trưng THPT Trần Quốc Tuấn tơ̆ thĭ trơ̆n Đăk Hà, apŭng Đăk Hà, dêh char Kon Tum set hơ len đei pơ rang jĭ SARS-CoV-2. Nơ̆r tơ roi đơ̆ng Khul thây kô vei lăng hnam trưng ăn tơ băt, 50 ‘nu hŏk tro păng thây kô tơ ƀâp ŏh hŏk tro âu athei oei hơ drô̆ vă tang găn jĭ.

Hnam trưng THPT Trần Quốc Tuấn pơ gơ̆r pơ tho hŏk trư̆k tuyê̆n đơ̆ng rŏng kơ đei hŏk tro F0

Adrol kơ ‘nŏh, Khul thây kô vei lăng hnam trưng THPT Trần Quốc Tuấn ăn đe hŏk tro păng thây kô tơ ƀâp hăm hŏk tro F0 oei hơ drô̆ tơ̆ hnam. Đơ̆ng kơ sơ̆ Hnam trưng THPT Trần Quốc Tuấn đei tơ plih đơ̆ng năm hŏk tơ̆ hnam trưng jing hŏk trư̆k tuyê̆n. Anih vei lăng tơ drong jĭ jăn dêh char Kon Tum păng khul jang pơ gang kơ apŭng pơ gơ̆r hơ len năng dôm bơ ngai athei oei hơ drô̆ păng set hơ len jĭ tơ̆ hnam trưng THPT Trần Quốc Tuấn.

Pơ gơ̆r tơ chă păng set hơ len jĭ ăn dôm bơ ngai krê tơ pŏh jĭ đơ̆ng F0

Đei băt ŏh hŏk tro L.T.H.G tam đei ƀet vắc xin, tơ pŏh jĭ COVID-19 đơ̆ng mŏ sư oei tơ̆ Tân Phú, plt Đồng Xoài, dêh char Bình Phước vih, hlôi oei hơ drô̆ đang. Anih jang pơ gang dêh char Kon Tum păng khul jang kơ pal kơ dêh char Kon Tum oei hăt pơ gơ̆r tơ chă jĭ, set hơ len jĭ ăn dôm bơ ngai krê tơ pŏh đơ̆ng 5 ‘nu F0. Blŭng a, khul jang kơ pal chih đei dang 230 ‘nu bơ ngai F1.

Dơ̆ng: Tơ blơ̆