VOV4.Bahnar  – Năr 21/7, Anih jang Y tê̆ dêh char  Kon Tum hlôi xơkơ̆t đei bơngai mă 3 ƀơm jĭ SARS-CoV-2, noh jing ƀok B.T.X. tơ̆ xăh Đăk Môn, apŭng Đăk Glei. Đơ̆ng rŏng năm truh apŭng KBang, dêh char Gia Lai đei tơrĕkt ơjê̆ hăm dôm bơngai ƀơm jĭ COVID-19, ƀok B.T.X đơ̆ng Gia Lai vih tơ̆ dêh char Kon Tum truh Anih dơ̆t hơlen pơrang jĭ Kơsô̆ 1 Sao Mai, lơ̆m xăh Hòa Bình, plei tơm Kon Tum păng đei 'nhăk hơlen pham păng băt ƀơm jĭ SARS-CoV-2. Kiơ̆ Jơnŭm jang tang găn păng tơjră pơrang jĭ COVID-19 dêh char Kon Tum bơngai F0 âu adôi nhen 2 'nu F0 adrol kơ noh adoi đei ƀôh băt păng tơtom 'nhăk pơkăp oei tơklăh tơ̆ Anih hơlen pơrang jĭ, tam mă mơ̆t truh tơring kơ dêh char Kon Tum.  Vă vei xơđơ̆ng tơdrong jang tang găn păng tơjră pơrang jĭ COVID-19, Anih jang Y tê̆ dêh char Kon Tum đei Tơchơ̆t tơbang tơtenh chơ chă bơngai đei truh Anih dơ̆t hơlen pơrang jĭ Sao Mai tơ̆ jăl trong 14, lơ̆m thôn 2 xăh Hòa Bình, plei tơm Kon Tum.

Lan chih păng pơre nơ̆r