VOV4.Bahnar - ‘Năr 27/7, dêh char Kon Tum đei dơ̆ng 2 ‘nu bơ ngai tơ pŏh pơ rang jĭ SARS-CoV-2 hơ tŏk đĭ đăng F0 kơ dêh char truh 6 ‘nu. Nhen 4 ‘nu bơ ngai F0 adrol kơ ‘nŏh, 2 ‘nu bơ ngai tơ pŏh pơ rang jĭ SARS-CoV-2 tơ̆ dêh char Kon Tum kŭm đei chă ƀôh păng ăn oei hơ drô̆ tơ tom tơ̆ Anih gak hơ len jĭ, tam mă đei mât lơ̆m dêh char Kon Tum.  

Vei lăng bơ ngai truh đơ̆ng dôm dêh char đei jĭ găh Pơ băh tơ̆ Anih gak Sao Mai, plt Kon Tum

Đei băt 2 ‘nu bơ ngai âu lơ̆m ‘năr 26/7 năm hơ doi đơ̆ng Quảng Nam truh ƀât anih gak hơ len jĭ kơ sô̆ 2 tơ̆ krang Lò Xo trong Hồ Chí Minh, găh xăh Đăk Man, apŭng Đăk Glei, dêh char Kon Tum. Kiơ̆ đơ̆ng set hơ len hrĕnh ‘nŏh đei 1 ‘nu tơ pŏh pơ rang jĭ SARS-CoV-2. ‘Năr 27/7, tơ drong set hơ len ăn ƀôh pơ đĭ 2 ‘nu măr sư tơ pŏh pơ rang jĭ SARS-CoV-2 ngăl.

Dang ei 2 ‘nu bơ ngai âu oei ăn oei hơ drô̆ vă hơ met jĭ tơ̆ Anih 2 Hnam pơ gang Y Dược cổ truyền – Hơ met jo jăn dêh char Kon Tum. Truh dang ei dêh char Kon Tum đĭ đei 6 ‘nu bơ ngai jĭ COVID-19, mă lei tam mă đei bơ ngai tơ pŏh jĭ lơ̆m tơ pôl.

Dơ̆ng: Tơ blơ̆