VOV4.Bahnar - 2 năr ‘nâu, yoa ƀơ̆m kơ nê̆ đơ̆ng ‘mi kial kơ sô̆ 6 pơm ăn lơ tơ ring lơ̆m dêh char Kon Tum đei ‘mi đơ̆ng păh lăp truh ‘mi tih, tơ dra adrol lơ̆m 24 jơ truh tơ̆ dêh char hơ nơ̆ng đei ‘mi păh lăp, ‘mi tih, đei tơ ring ‘mi tôch tih. Tơ̆ dôm apŭng: Đăk Glei, Tu Mrông, Kon Plông đak ‘mi rŏ năng đơ̆ng 100 - 200mm tôch krê đei đak lŏk tơ jroh, tĕh hơ lih. Tơ̆ hơ năp tơ drong ‘nâu, Kơ dră vei lăng kon pơ lei dêh char Kon Tum đei nơ̆r athei jăh tơ lĕch trong tơ jră hăm ‘mi tih, đak tơ jroh, tĕh hơ lih.

Mĭnh anih đak lơ̆p tơ̆ xăh Đăk Pxi, apŭng Đăk Hà, dêh char Kon Tum lơ̆m ‘măng ‘mi kial kơ sô̆ 5

Kiơ̆ kơ ‘nŏh, Kơ dră vei lăng kon pơ lei dêh char Kon Tum Lê Ngọc Tuấn athei Kơ dră vei lăng kon pơ lei 10 apŭng, plt lơ̆m dêh char hơ len kơ jăp ‘mi kial kơ sô̆ 6 păng ‘mi tih đak lơ̆p; roi tơ băt mă tơ tom ăn dôm khul grŭp, rim bơ ngai păng kon pơ lei tơ̆ tơ ring vă đei trong tơ jră, atŭm hăm ‘nŏh dăr hơ len, hơ met tơ mam, tơ jră hăm ‘mi tih, đak lơ̆p, đak tơ jroh, tĕh hơ lih, phŭt huơ̆r tơ dăh đei, adrin ưh ăn đei hiong răm yoa ưh kơ chăng. Hăm dôm tơ ring ƀônh pŭ răm đơ̆ng ‘mi tih đak lơ̆p, đak tơ jroh, tĕh hơ lih… ‘nŏh roi tơ băt mă tơ tĕnh ăn kon pơ lei vă đe đei đon kơ chăng tơ jră.  

Dơ̆ng: Tơ blơ̆