VOV4.Bahnar - Năr 21/10, dêh char Kon Tum ƀô̆h 8 ‘nu F0 mă blŭng lơm kon pơlei, đei 5 ‘nu lơ̆m 1 ŭnh hnam oei tơ̆ Thôn 5, tơring Hà Mòn, apŭng Đak Ha păng 3 ‘nu kang ƀô̆, bơngai jang pơgang kơ Hnam pơgang apŭng Tu Mrông. Mă kăl 3 ‘nu kang ƀô̆, ƀok thây pơgang apŭng Tu Mrông hlôi băt hơdăh tơpŏh sơmach jĭ SARS-CoV-2 dang ei tim mă băt hơdăh tơdrong tơpŏh au đơ̆ng yơ păng hlôi đei ƀet tôm 2 jrŭm vaccine tang găn jĭ Covid-19 bơih.

Khŭl bơ̆ jang apŭng Đak Ha iung jang tang găn jĭ Covid-19 tơ̆ pơlei

Vă tang găn jĭ hơbŭh, Dơnŏ anĭh vei lăng kon pơlei dêh char đei hla bơar tơchơ̆t hăt hot pơrô̆ athei tơlĕch jang hloi rim trong jang tang găn jĭ hơbŭh Covid-19. Mă hơdăh, dêh char Kon Tum athei jang vat tơring pơvang tang găn să pơgia lơ̆m pơlei đei bơngai jĭ vă tơlĕch jang kiơ̆ rim trong jang tang găn pơrang jĭ. Hăm 4 apŭng, pơlei tơm đei bơngai jĭ lơ̆m kon pơlei, ‘nŏh Đak Hà, Tu Mrông, Đak Tô păng pơlei tơm Kon Tum, rim hơnĭh ƀơm trŭh iung jang hloi vat tơring pơvang tang găn, khăm hơlen, pơjing pơvang tang găn tơring đei jĭ Covid-19 (tơ̆ hơnĭh iĕ, tơdăh kăl vă jang).

Tơblơ̆ nơ̆r: Amazưt