VOV4.Bahnar - Đei hlŏh 3.000 tơ drong jang đei roi tơ băt ăn đoàn viên, druh dăm, bơ ngai jang tơ̆ dêh char Kon Tum lơ̆m năr chă tơ drong jang păng iung jang xa sơ năm 2021 đei Anih vei lăng tơ drong jang xa, linh jĭ rơ ka păng tơ pôl jang hơ doi hăm Anih jang đoan dêh char Kon Tum pơ gơ̆r ‘năr 27/4, tơ̆ plt Kon Tum.

Chă hơ len năng anih chă bơ ngai jang lơ̆m Năr chă tơ drong jang păng iung jang xa

Vang akŏm lơ̆m năr chă tơ drong jang păng iung jang xa sơ năm 2021, kơ hrĕng ‘nu đoàn viên, druh dăm, bơ ngai jang tơ̆ dêh char Kon Tum đei roi tơ ƀôh trong jang xa păng chă tơ drong jang. Lơ̆m kơ sô̆ âu lơ bơ ngai hlôi chă đei tơ drong jang lăp ‘lơ̆ng tơ̆ 52 anih iŏk bơ ngai jang.

Mă đơ̆ng ƀơm ưh ‘lơ̆ng đơ̆ng jĭ COVID-19, mă lei sơ năm 2020 păng vă jê̆ 4 khei blŭng năm 2021, anih vei lăng tơ drong jang xa, linh jĭ rơ ka păng tơ pôl dêh char Kon Tum oei chă đei tơ drong jang ăn hlŏh 3.400 ‘nu bơ ngai bơ̆ jang kơ tă lơ̆m tĕh đak, 178 ‘nu bơ ngai năm jang tơ̆ tĕh đak đe kiơ̆ khei ‘năr hơp găt, atŭm hăm ‘nŏh pơ gơ̆r roi tơ ƀôh trong iung jang xa ăn hlŏh 10.000 ‘nu đoàn viên, druh dăm păng bơ ngai jang tơ̆ tơ ring tơ rang.

Dơ̆ng: Tơ blơ̆