VOV4.Bahnar - Tơ\ dêh char Kon Tum, mu\k drăm - tơpôl oei tơnap tap, dôm anih pơchơt ‘lơ\ng xđơ\ng oei to\ xe\t, ho\k tro hơnơ\ng tơchă truh dôm anih internet vă ngôi  game teh băl dăh mă xo# băl năm hu\m tơ\ dơnâu đak, đak glung đak krong noh xar bar rơka hơbur hơnơ\ng kơ [ôh.

Tam mă tom hơ iă hăm tơdrong đei jơnei găh ho\k pơhrăm đơ\ng ro\ng kơ ‘măng xkơ\t pơtôch xơnăm ho\k đơ\ng bre kon, noh pơmai Trần Thị Phúc tơ\ th^ tra#n  Đak Hà, apu\ng Đak Hà, dêh char  Kon Tum pơngơ\t kơ đon hăm tơdrong pơdơh hè kơ đe xư. Kron 2 ‘nu kon lơ\m hnam noh bơnat, gơih tơ\ yơ duh ưh kơ đei xđơ\ng jơhngơ\m. Th^ tra#n noh ie\, anih pơchơt ưh kơ đei lơ, dôm anih pơtho ho\k tơdrong pơchơt duh ưh kơ đei hơ iă, noh pơngơ\t kơ đon tơpă. Pơmai Phúc tơroi: “Pơyan hè đe mon pơdơh kơ ho\k, me\ [ă noh năm jang ưh kơ đei bngai vei lăng. Đe mon oei xa tơ\ hnam noh hiơ\r kơ jơhngơ\m dêh. Mă 2 dơ\ng noh lơ\m pơyan pơdơh hè hơnơ\ng đei dôm tơdrong j^ noh me\ [ă pơngơ\t kơ đon mơ\n”

Oei [ok Nguyễn Thành Lập tơ\ pơlei Kon H’Ngo Klah, xăh Ngọc Bay, plei tơm  Kon Tum noh ăn tơbăt, bngai ‘lo\ noh măng năr năm jang tơ\ mir pơgar, pơyan pơdơh hè noh hơ ioh ưh kơ đei vei lăng tơnăp hiôk kơ jing b^ lui, mă hăt noh đơ\ng năr tơring âu đei anih tơ[ăk Internet. {ok Lập tơroi:“ Đơ\ng năr đei Internet truh dang ei noh hăp ako\m tơ\ noh đe\ch lăh. Pơlei đơ\ng kơpơ\ng to jur tơ\ pơlei găh kơ ‘na#m. Pơlei bngai kon kông noh năm tơ\ pơlei bngai Kinh. Mă hơtuch noh kơnh jing b^ lui, ako\m băl 5-7 ‘nu. Jên me\ [ă ưh kơ đei, hin dơnuh noh năm chă tơtông tơmam đe đe\ch lăh”

Dêh char Kon Tum dang ei đei vă je# 171 rơbâu ‘nu hơ ioh tơ\ hơla 16 xơnăm mă lơ noh erih hăm me\ [ă tơ\ tơring pơxe\l. Pơyan pơdơh hè ưh kơ đei năm truh tơ\ hnam trưng, đe oh ‘meh chă pơchơt pơxuh hơ iă. Mă lei, kiơ\ xkơ\t đơ\ng Jonu\m pơgơ\r tơdrong jang yuơ hơ ioh dêh char Kon Tum, dôm tơmam drăm joh ayo\ đơ\ng dêh char truh tơ\ tơring oei k[ah. Lơ xăh ataih yaih nhen le\ tam mă đei anih pơxuh pơchơt ‘măn ăn hơ ioh. K[ah dôm tơdrong pơxuh pơchơt ‘lơ\ng xđơ\ng lơ\m pơyan pơdơh hè noh hơ ioh hiôk [ơm tơdui lơ\m tơdrong pơxuh ưh kơ đei xđơ\ng nhen teh tôn pơm hli hlơt truh tơdrong erih hơkâu jăn.

2 xơnăm kơ âu tơ\ Kon Tum đei vă je# 3.000 ‘nu hơ ioh xar bar rơka hơbur, lơ\m noh 70 ‘nu hlôi lôch. Tơdrong tơm noh lôch glơ\k tơ\ đak, xar bar, unh hơyuh hrip păng lơ noh đei [ôh ăh pơyan pơdơh hè. ‘Nao âu, yuơ pơhơi hăm tơdrong vei lăng đơ\ng me\ [ă, 3 ‘nu ho\k tro tơ\ apu\ng Đak Tô, 3 ‘nu hơ ioh tơ\ apu\ng Sa Thầy lăp ‘nao 14, 15 xơnăm hlôi io\k gre honđa kơ unh hnam chơ băl năm kiơ\ trong păng [ơm xar bar pơm pơđ^ 4 ‘nu hơ ioh lôch kơtă. {ok Vũ Văn Đam, Pho\ kdră anih jang vei hơlen hơ ioh, lơ\m anih jang Lao đo\ng Thương binh Xăh ho#i dêh char Kon Tum tơroi: “Đei pơdơh hè hnam trưng ưh kơ đei vei lăng đe oh ôh. Ăh pơjao đe oh vih tơ\ tơring noh tơdrong vei hơlen duh ưh kơ đei kjăp xđơ\ng, rơdu lơ\m tơdrong vei hơlen lơ\m 3 khei pơdơh hè. Đei pơdơh pơdơi hiôk chơt, pơxuh pơchơt đe oh năm hu\m tơ\ đak krong, đak glung noh hơnơ\ng kơ đei xar bar pơngơ\t kơ đon hăm hơ ioh”

            Minh pơyan pơdơh hè hăt hot hăm tơdrong hơ iă oei gô chang hăm hơ ioh, mă lei jing tơdrong hiơ\r kơ jơhngơ\m bngai pơm me\ [ă. Pơm thoi yơ vă kon hơ ioh po đơ\ng ro\ng kơ minh xơnăm ho\k gleh lap, gơh đei pơdơh pơdei pơchơt hiôk hian xđơ\ng, [lep hăm xơnăm hơ ioh... adoi jing minh nơ\r apinh tơnap kơ tơl lơ\m pơyan pơdơh hè âu, mă hăt noh tơ\ minh [ar dêh char groi kông nhen Kon Tum, tơring mă mu\k drăm tơpôl oei lơ tơnap tap.

Lan chih păng rapor