VOV4.Bahnar - Lơ̆m 2 năr ‘năr 26 păng ‘năr 27/4, tơ̆ pơ lei tơm Kon Tum, Khŭl jang vei lăng drŏ kăn dêh char Kon Tum pơ gơ̆r pơ hrăm hơ met ăn tơ drong hlôh vao păng gơ̆h hơ gei ăn drŏ kăn lĕch pơ jei ‘măng mă blŭng lĕch pơ jei pơm bơ ngai tang măt Jơ nŭm pơ gơ̆r kon pơ lei rim tơ ring jăl jang 2021- 2026. Vang akŏm lăm pơ hrăm, vă jê̆ 200 ‘nu drŏ kăn lĕch pơ jei mă blŭng vang lĕch pơ jei pơm bơ ngai tang măt Jơ nŭm pơ gơ̆r kon pơ lei rim tơ ring kơ dêh char Kon Tum, jăl jang 2021- 2026 đei hơ met ăn dơ̆ng tơ drong hlôh vao găh Kuôk hô̆i păng Jơ nŭm pơ gơ̆r kon pơ lei; hlôh dơ̆ng tơ drong hơ găt găh krao hơ vơn pôk rơ̆ih, hơ năp jang, tơ drong jang đơ̆ng Khŭl jang vei lăng drŏ kăn rim tơ ring lơ̆m vang pôk rơ̆ih bơ ngai tang măt Kuôk hô̆i păng Jơ nŭm pơ gơ̆r kon pơ lei; đei pơ hrăm yan âu tơ drong gơh pơ ma dơ nuh hăm khŭl chih kơ tơ̆ng ang, pơ jing um rup kơ dih; băt tơ roi tơ băt, tơ̆l nơ̆r apĭnh đơ̆ng bơ ngai tăh hla.

Bơ ngai pơ tho pơ ma dơ nuh hăm drŏ kăn lĕch pơ jei ‘măng mă blŭng vang lĕch pơ jei pơm bơ ngai tang măt Jơ nŭm pơ gơ̆r kon pơ lei rim tơ ring

‘Ngoăih kơ ‘noh drŏ klăn lĕch pơ jei ‘măng mă blŭng vang lĕch pơ jei pơm bơ ngai tang măt Jơ nŭm pơ gơ̆r kon pơ lei rim tơ ring kơ dêh char, oei đei 1,2 ‘nu bơ ngai tang măt vang jang lơ jăl Kuôk hô̆i, Jơ nŭm pơ gơ̆r kon pơ lei dêh char vang tơ roi tơ drong hlôh vao yan âu lơ̆m tơ drong băt hơ dăh jơ hngơ̆m đon hơ pơi ‘mĕh vă đơ̆ng bơ ngai tăh hla kŭm nhen đei nơ̆r tơ gop vang akŏm rim tơ drong kăl kơ ‘măng hop akŏm.

Thuem: Tơ blơ̆