VOV4.Bahnar - Dêh char Kon Tum hơ nơ̆ng lăng kăl, hơ tŏk ‘lơ̆ng đei yua tơ drong jang đơ̆ng Hơp tak xăh, grŭp jang hơ dai; hơ tŏk loi dơ̆ng iŏk yua tơ gop đơ̆ng hơ nih jang mŭk drăm tơ pôl lơ̆m hơ tŏk mŭk drăm, sut pơ ngot, tơ jur dơ nuh hin 1 trong kơ jăp; hơ tŏk ‘lơ̆ng hơ năp jang, anih dơ̆ng đơ̆ng hơ nih jang mŭk drăm tơ pôl lơ̆m mŭk drăm.

Kon Tum hơ tŏk hơ năp jang đơ̆ng grŭp jang hơ dai lơ̆m pơ tăm sâm Ngọc Linh hơ la yơ̆p bri brăh

‘Nâu jĭ nơ̆r pơ ma hơ dăh đơ̆ng khŭl jang chĕp kơ̆l Anih jang Đảng dêh char Kon Tum tơ̆ Hop akŏm pơ tôch 20 sơ năm jang kiơ̆ tơ drong tơ chơ̆t 13 kơ Anih chĕp kơ̆l Trung ương Đảng jăl 9 găh hơ nơ̆ng tơ plih ‘nao, hơ tŏk tơ iung, hơ tŏk ‘lơ̆ng đei yua mŭk drăm tơ pôl păng 10 sơ năm tơ lĕch jang kiơ̆ Khôi luơ̆t Hơp tak xăh sơ năm 2012 pơ gơ̆r ‘năr 23/11, tơ̆ pơ lei tơm Kon Tum. Đơ̆ng rŏng 20 sơ năm jang kiơ̆ tơ drong tơ chơ̆t, truh dang ei dêh char Kon Tum đei 194 Hơp tak xăh hăm hloh 9.700 ‘nu jang păng 210 grŭp jang hơ dai hăm vă jê̆ 2.200 ‘nu bơ ngai jang lơ̆m grŭp tŏk bŏk bơ̆ jang. Iŏk yua jô̆ păh lăp đơ̆ng 1 ‘nu bơ ngai jang lơ̆m Hơp tak xăh đei dang 41 triệu hlak jên 1 sơ năm.

Tơ drong jang pơm tơ lĕch chĕh phe rơ goh kơ 1 Hơp tak xăh tơ̆ apŭng Đăk Hà, dêh char Kon Tum

Khŭl jang chĕp kơ̆l lơ̆m Anih jang Đảng dêh char Kon Tum băt hơ dăh, hơ nơ̆ng lăng kăl hơ tŏk ‘lơ̆ng đei yua tơ drong jang đơ̆ng Hơp tak xăh, grŭp jang hơ dai; hơ tŏk ‘lơ̆ng đei yua vang tơ gop đơ̆ng mŭk drăm tơ pôl lơ̆m hơ tŏk mŭk drăm, sut pơ ngot, tơ jur dơ nuh hin 1 trong kơ jăp; hơ tŏk hơ năp jang, anih dơ̆ng đơ̆ng mŭk drăm tơ pôl lơ̆m tơ drong jang mŭk drăm.

Thuem: Tơ blơ̆