VOV4.Bahnar - Hơ nơ̆ng lơ̆m dôm khei pơ yan phang âu ki khul jang kơ pal, khul kơ dră pơ gơ̆r dôm tơ ring, tơ ‘ngla bri păng kon pơ lei dêh char Kon Tum athei kơ rŭn tôch ai bơ̆ jang hloi 2 tơ drong tôch gĭt kăl, ‘nŏh jĭ tang găn unh xa păng vei lăng tơ mam drăm bri brăh.

Đơ̆ng adrol kơ Têt Nguyên đán Tân Sửu truh dang ei, khul jang kơ pal, dôm anih tơ ‘ngla bri, Khul kơ dră pơ gơ̆r tơ ring, tơ pôl păng kon pơ lei iŏk vei lăng bri tơ̆ dêh char Kon Tum hơ nơ̆ng hơ tŏk jơ hngâm gak vei lăng unh, hơ mơt unh xa bri. ‘Nhŏng A Cường, tơ̆ plei Đăk Kon, xăh Đăk Rơ Nga, apŭng Đăk Tô ăn tơ băt, kon pơ lei iŏk vei lăng 270ha bri ‘long đơ̆ng Công ty jang ‘long Đăk Tô. Đei xa jên vei lăng bri ‘nŏh bơ̆n athei vei lăng bri mă ‘lơ̆ng:

“Gak prăt măng, prăt năr, kăl hlŏh jĭ vei lăng bri yoa hli kơ unh xa. Têt kŭm trư̆k, ưh đei têt kŭm trư̆k, trư̆k đĭ pơ yan phang hli kơ unh xa bri. Rim năr ba athei hơ nơ̆ng năm dăr joang. Đĭ đăng pơ lei vang trư̆k, pơ lơ̆h băl trư̆k”. 

Tơ̆ apŭng sơ lam Ia H’Drai, tơ ring đei hlŏh 88 rơ bâu ha bri ‘long păng tĕh bri, ƀok Nguyễn Quốc Tuấn, Kơ dră Anih vei lăng bri ‘long apŭng ăn tơ băt:

“Pơ yan tŏ phang đunh, tôch hơ mơt kơ unh xa bri. Nhôn chih hơ dăh dôm tơ ring hơ mơt đei unh xa bri vă athei gak hơ nơ̆ng prăt măng, prăt năr. Dôm tơ ‘ngla bri đei khul vei lăng bri ngăl. Khul jang ‘nŏh vei lăng bri hai păng tang găn unh xa bri hai. Hơ dai hăm ‘nŏh đei trong jang hơ doi hăm dôm anih jang, hăm Dơ nŏ anih vei lăng kon pơ lei xăh păng dôm anih jang tơ̆ tơ ring. Dôm tơ ‘ngla bri athei bơ̆ jang trŏ trong đei kĭ pơ kăp 4 kơ tă vă gơ̆h kơ chăng mưh đei unh xa bri”.

Tơ drong jang vei lăng bri tơ̆ dêh char Kon Tum khei ‘năr âu ki tôch tơ tŏ. Kơ tă lơ̆m dôm hop akŏm pơ ma găh bri ‘long, đei ƀôh jơ hngâm đon jang tôch tơ năp, ‘nŏh jĭ đon adrin tôch ai đơ̆ng kơ dră chĕp kơ̆l dêh char kŭm nhen anih jang kơ pal lơ̆m tơ drong vei lăng tĕh bri ‘long dang ei păng tơ drong pơ tăm ming ‘long bri. Tơ̆ hop akŏm pơ tôch tơ drong jang vei lăng păng atŏk tơ iung bri sơ năm 2020; tơ lĕch tơ drong jang sơ năm 2021 păng dôm sơ năm đơ̆ng rŏng, Bí thư Đảng dêh char Kon Tum Dương Văn Trang pơ ma hơ dăh, athei tơ pŭ hơ năp jang mă rơ đăh ăn rim anih jang đảng, anih jang, tơ ring tơ rang, tơ ‘ngla bri păng sek tơ lang tơ păt kăn ƀô̆, đảng viên pơm glăi lơ̆m tơ drong vei lăng bri:

“Đĭ đăng rim anih jang athei hơ nơ̆ng chĕp kơ̆l pơ gơ̆r tơ drong vei lăng bri mă ‘lơ̆ng, đei yoa ƀiơ̆ păng bơ ngai chĕp kơ̆l anih jang đảng athei iŏk jang tơ drong ‘nŏh, tơ dăh oei đei lơ tơ drong ưh kơ ‘lơ̆ng ‘nŏh bơ ngai chĕp kơ̆l đảng âu athei chĭu pŭ blŭng a. Dơ nŏ anih vei lăng kon pơ lei dêh char, Dơ nŏ anih vei lăng kon pơ lei apŭng, Dơ nŏ anih vei lăng kon pơ lei xăh, dôm tơ ‘ngla bri đei pơ jao tơ drong jang vei lăng bri athei chih tơ lĕch trong jang, pơ gơ̆r vei lăng, dăr joang hơ nơ̆ng. Tơ dăh lê̆ đei lơ tơ drong glăi ‘nŏh athei chĭu pŭ tơ̆ hơ năp anih jang đảng dêh char. Sek tơ lang tơ păt kăn ƀô̆, đảng viên pơm glăi mưh bơ̆ jang lơ̆m tơ drong vei lăng bri”.

Anih jang đảng dêh char Kon Tum oei adrin tôch ai lơ̆m tơ drong vei lăng vă jê̆ 549.000ha bri brăh, hlŏh 61.600 ha bri ‘long pơ tăm păng oei pơ hnŏng lơ̆m 5 sơ năm truh pơ tăm dơ̆ng 15.000ha ‘long bri. Vă jang đei tơ drong ‘nâu, 1 lơ̆m dôm tơ drong jang tôch gĭt kăl mă dêh char Kon Tum chih tơ lĕch ‘nŏh hơ nơ̆ng tưk tơ iung tơ drong đei yoa đơ̆ng trong jang, kla jên mưh iŏk yoa cham char bri brăh hăm anih jang vă vei lăng păng atŏk tơ iung bri 'long kơ jăp 'lơ̆ng. 

‘Măng pơma dơnŭh đơ̆ng Bơngai chĭh tơdrong tơroi au hăm ƀok Hồ Thanh Hoàng, Kơdră chĕp pơgơ̆r Hơnĭh mong jên Vei lăng păng Atŏk tơ iung bri dêh char Kon Tum găh dôm trong jang tĭh lơ̆m sơnăm 2021 păng tơdrong jang kiơ̆ trong bơ̆ jang Kla ăn kon jên iŏk yua cham char bri jăl I au ki kơ dêh char Kon Tum.  

- Ƀok ăi, lơ̆m sơnăm 2021 trong vă jang iŏk, tơlĕch kon jên kla ăn iŏk yua cham char bri kơ dêh char Kon Tum đei jang kiơ̆ hăm dôm trong jang hơ dăh yă kiơ?

-Tơl: Lơ̆m sơnăm 2021, Hơnĭh mong jên Vei lăng păng Atŏk tơ iung bri dêh char Kon Tum tơlĕch jang kiơ̆ rim tơdrong vă jang nhen tơ̆ hơla au:

Găh trong vă jang iŏk, tơlĕch kon jên iŏk yua cham char bri. Trong vă jang thuê̆ iŏk ‘nŏh 298 ti 688 trĭu hlak jên, lơ̆m au Hơnĭh mong jên dêh char Kon Tum gô thuê̆ iŏk hloi 65 ti 300 trĭu hlak jên; Hơnĭh mong jên Vei lăng păng Atŏk tơ iung bri Việt Nam tơgŭm ăn ‘nŏh hlŏh 233 ti hlak jên.

Tơdrong vă jang tơlĕch ăn đơ̆ng kon jên thuê̆ iŏk sơnăm 2021 ‘nŏh 298 ti 688 trĭu hlak jên, lơ̆m au tơlĕch ăn pơjing kon jên răk hmŏ ‘nŏh 14 ti 900 trĭu hlak jên hơtŏ 5% trong tơlech jang. Kon jên au trŭh hơtuch sơnăm ăn pơ đĭ rim tơngla bri đei hơgăt tĕh bri ăn jang Iŏk yua cham char bri.

Mă ƀar kon jên ăn rim tơngla bri ‘nŏh hơnĭh jang, rim Dơnŏ anĭh vei lăng kon pơlei tơring, thĭ trân păng rim ŭnh hnam, rim bơngai, pơlei ‘nŏh 256 ti 400 trĭu hlak jên. Kon jên ăn rim hơnĭh bơ̆ jang tơgŭm tơdrong jang kơ Hơnĭh mong jên Vei lăng păng Atŏk tơ iung bri dêh char; kon jên tơgŭm ăn rim hơnĭh jang pơjing Trong jang vei lăng bri kơ jăp ‘lơ̆ng jăl jang 2021-2030, tơlĕch kon jên tơgŭm pơtăm bri sơnăm 2021 păng tơlĕch ăn kon jên khŭl bơ̆ jang chĕp pơgơ̆r Hơnĭh mong jên ‘nŏh 24 ti 800 trĭu hlak jên. Răk hơlau lơ̆m tơdrong thuê̆ iŏk ư̆h kơ tôm păng đei dơ̆ng tơdrong jang hle lơ̆m sơnăm 2021 ‘nŏh 4 ti 800 trĭu hlak jên.

Găh dôm tơdrong jang mă blŭng ‘nŏh hơtŏk kơtang bơ̆ jang dăr lăng, pơrô̆ pơrôp rim hơnĭh jang iŏk yua Cham char bri ba ăn jên mă tôm, tơtom ăn Hơnĭh mong jên Vei lăng păng Atŏk tơ iung bri dêh char Kon Tum kiơ̆ tơdrong tơchơ̆t păng athei Hơnĭh mong jên Vei lăng păng Atŏk tơ iung bri Việt Nam pơtrŭh ăn kon jên Iŏk yua cham char bri ăn Hơnĭh mong jên Vei lăng păng Atŏk tơ iung bri dêh char Kon Tum vă sơđơ̆ng ăn tơdrong jang thuê̆ iŏk sơnăm 2021 păng kiơ̆ trong tơlĕch jang.

Tơlĕch kon jên Iŏk yua cham char bri ăn đĭ đăng tơngla bri tôm, tơtom, tơpăt, tơgop vei lăng năng tông dang 384.000 ha bri jơnei dang 67,3% akŏp hơgăt tĕh bri lơ̆m dêh char, ư̆h kơ jô̆ hơgăt tĕh pơtăm ‘long kasu, ‘long gĭt kăl.

Tơlĕch jang tôm tong, tơtom rim tơdrong jang pơrô̆ pơrôp, pơtho tơbăt vă atŏk kơtang jơhngơ̆m đon hlô̆h vao kơ rim hơnĭh jang, rim bơngai đei ƀơm trŭh păng đĭ đăng kon pơlei erĭh sa lơ̆m bri, tơter bri, tơjê̆ bri găh trong jang kla ăn kon jên iŏk yua cham char bri, tơgop vei lăng năng tông păng atŏk tơ iung bri roi năr roi ‘lơ̆ng hơ iă hlŏh dơ̆ng.

Pơgơ̆r iung jang dăr lăng năng tông lơ̆m bơ̆ jang vei lăng, iŏk yua kon jên Iŏk yua cham char bri hăm rim tơngla bri ‘nŏh hơnĭh jang, rim Dơnŏ anĭh vei lăng kon pơlei tơring, thĭ trân lơ̆m dêh char vă atŏk kơtang jang ‘lơ̆ng bơ̆ jang vei lăng, iŏk yua kla ăn kon jên Iŏk yua cham char bri.

Pơgơ̆r iung jang dăr lăng, xơkơ̆t hơdăh hơgăt tĕh bri ăn jang Iŏk yua cham char bri sơnăm 2021 vă pơm kơnăl ăn hơlen, sơkơ̆t hơdăh păng kla ăn kon jên jang Iŏk yua cham char bri sơnăm 2021 ăn rim hơnĭh jang tơngal bri ‘nŏh hơnĭh jang, ŭnh hnam, rim bơngai, pơlei păng rim Dơnŏ anĭh vei lăng kon pơlei tơring, thĭ trân đei Tĕh đak pơjao ăn vei lăng năng tông bri.

- Lơ̆m jăl I au ki tơdrong jang kơ Hơnĭh mong jên Vei lăng păng Atŏk tơ iung bri dêh char Kon Tum hlôi iŏk đei gĭt kăl yă kiơ lơ̆m jang kiơ̆ tơdrong bơ̆ jang kla ăn kon jên iŏk yua cham char bri?

-Tơl: Lơ̆m jăl I sơnăm 2021, Hơnĭh mong jên vei lăng păng Atŏk tơ iung bri dêh char Kon Tum hlôi iŏk đei lơ̆m jang kiơ̆ tơdrong bơ̆ jang kla ăn kon jên iŏk yua cham char bri nhen tơ̆ hơla au:

Mă blŭng nhôn hlôi jang tơgŭm ăn Dơnŏ anĭh vei lăng kon pơlei dêh char  kĭ tơchơ̆t Tơdrong vă jang thuê̆ iŏk, tơlĕch kla ăn kon jên iok yua cham char bri kơ dêh char Kon Tum păng hơmet ăn kon jên bơ̆ jang vei lăng kơ Hơnĭh mong jên Vei lăng păng atok tơ iung bri dêh char Kon Tum.

Mă ƀar nhôn hlôi pơma dơnŭh păng kĭ pơkăp hăm 2 hơnĭh jang iok yua cham char bri ‘nŏh 2 hnam kmăi đak tơlĕch ŭnh hơyŭh ‘nao tơmơ̆t jang păng pơkeh jang đang kĭ pơkăp jang hơdoi kơ 1 hơnĭh iŏk yua cham char bri yuơ tơ plĭh jing tơring pơbăh đei ƀơm lơ dêh char kơ yuơ Hơnĭh mong jên Vei lăng păng Atok tơ iung bri Việt Nam gô thuê̆ iŏk jên jang tơdrong au.

Jô̆ trŭh năr 31/3/2021, Hơnĭh mong jên Vei lăng păng Atŏk tơ iung bri dêh char hlôi thuê̆ iŏk đei hlŏh 101 ti 700 trĭu hlak jên đơ̆ng dôm hơnĭh iŏk yua cham char bri, jơnei 34,08% trong tơlech jang mă Dơnŏ anĭh vei lăng kon pơlei dêh char pơjao ăn.

Tơdrong mă ƀar nhôn hlôi xơkơ̆t hơdăh păng kla ăn kon jên iŏk yua cham char bri sơnăm 2020 ăn rim tơngla bri ‘nŏh khŭl jang, rim Dơnŏ anĭh vei lăng kon pơlei tơring, thĭ trân, ŭnh hnam, tơngla bơngai, pơlei; iŏk hơdrol kon jên iŏk yua cham char bri sơnăm 2021 ăn rim tơngla bri ‘nŏh khŭl jang; akŏp kon jên tơlĕch ăn trŭh năr 31/3/2021 ‘nŏh hlŏh 48 ti 300 trĭu hlak jên. Lơ̆m au kla ăn kon jên bơ̆ jang kơ sơnăm 2020 ‘nŏh 44 ti 700 trĭu hlak jên, ăn tŏk iŏk hơdrol kon jên iŏk yua cham char bri sơnăm 2021 ‘nŏh 3 ti 600 trĭu hlak jên.

Tơdrong tơ̆ hơnăp au kơnh nhôn hơnơ̆ng hơmet ‘lơ̆ng jang hơdoi hăm Hơnĭh mong jên Mơdro sa Bưu điện Liên Việt- Hơnĭh jang tơ̆ dêh char Kon Tum tơlĕch ăn kon jên jang iŏk yua cham char bri sơnăm 2020 ăn rim tơngla bri ‘nŏh ŭnh hnam, rim bơngai đei tĕh đak pơjao ăn tĕh, pơjao bri lơ̆m dêh char Kon Tum.

Nhôn hlôi pơgơ̆r 3 ‘măng hop akŏm pơtho tơbăt tơdrong jang găh kih thuơ̆t lơ̆m jang kiơ̆ tơdrong bơ̆ jang kla ăn kon jên iok yua cham char bri ăn rim Dơnŏ anĭh vei lăng kon pơlei tơring, thĭ trân vă pơtho tơbăt ăn rim tơring au jang kiơ̆ kmăi kmŏk gơ̆h hơgei tơgŭm ăn bơ̆ jang dăr lăng, sơkơ̆t hơdăh hơgăt tĕh pơtrŭh ăn tơdrong jang iŏk yua cham char bri sơđơ̆ng tĕnh koăng, ƀlep, pơkom kon jên jang.

Nhôn hlôi pơgơ̆r dăr lăng, lăng hơlen tơdrong pơtăm, vei lăng bri ‘long ‘nao, tơgum pơtăm ‘long jang sa yuơ rim hơnĭh ba ăn Hơnĭh mong jên Vei lăng păng Atŏk tơ iung bri dêh char Kon Tum.

Jang hơdoi hăm Dơnŏ anĭh vei lăng Chŏh jang sa păng Atŏk tơ iung tơring tơrang dêh char păng rim hơnĭh bơ̆ jang đei ƀơm trŭh jang tơgŭm ăn Dơnŏ anĭh vei lăng kon pơlei dêh char pơrô̆, chĕp pơgơ̆r tơlech jang tơdrong vă jang pơtăm ‘long tơplĭh ăn sơnăm 2021 păng jăl jang 2021-2025 vă jang kiơ̆ Tơdrong tơchơ̆t Pơm lê̆h hop akŏm Đảng dêh char Kon Tum ‘măng mă XVI jăl jang 2020-2025.

Nhôn hlôi pơjing păng tơlech jang kiơ̆ trong jang tơplĭh kơsô̆, jang kiơ̆ kmăi kmŏk kơtơ̆ng ang lơ̆m rim tơdrong jang, chĭh kơsô̆ hơgăt tĕh bri đei iŏk yua cham char bri lơ̆m kmăi kmŏk, vei lăng dôm bơngai đei ăn jang păng dôm bơngai iŏk yua cham char bri tơ̆ dêh char Kon Tum.

Bơngai chĭh: Khoa Điềm

Tơblơ̆ nơ̆r: Dơ̆ng - Amazưt