VOV4.Bahnar  – Đơ̆ng rŏng 15 năr pơm Lêh mơ̆t hŏk xơnăm hŏk 'nao kiơ̆ pơdăh tivi păng hŏk trư̆k tuyê̆n tơ̆ hnam vă tang găn păng tơjră pơrang jĭ COVID-19, pơgê năr (20/9), hloh 164.000 hŏk tro dôm jăl hŏk kơ dêh char Kon Tum truh hnam trưng pơtơm 'măng hŏk akŏm mă blŭng kơ xơnăm hŏk 'nao  2021-2022. 

          Tơdrong pơgơ̆r ăn đe hŏk tro truh hnam trưng akŏm đei dêh char Kon Tum hơlen hơdăh hăm tơdrong pơkăl xơđơ̆ng ăn đe hŏk tro păng bơngai pơtho. Truh dang ei, mă duh hlôi xơkơ̆t đei 27 'nu ƀơm jĭ SARS-CoV-2, chŏng mă Kon Tum jing dêh char adrô̆ tơ̆ tơring Tây Nguyên tam mă đei bơngai ƀơm jĭ lơ̆m tơpôl.

          Lơ̆m pơgê mă blŭng hŏk tro truh hnam trưng hŏk pơhrăm, Khul Kơpal kơ  373 hnam trưng hŏk tơ̆ Kon Tum hlôi pơm kiơ̆ kơjăp tơdrong tang găn păng tơjră pơrang jĭ COVID-19. Tôm hŏk tro duh nhen bơngai pơtho adoi đei hơlen hơyuh hơkâu jăn păng chô̆ che gom ƀŏ lơ̆m tơdrong pơtho hŏk pơhrăm tơ̆ hnam trưng.

Lan chih păng pơre nơ̆r