VOV4.Bahnar - Dêh char Kon Tum đei 6 tơring tơnap tap hlŏh, lơ̆m au đei 3 tơring sơlam tĕh đak păng 6 Kơđông ƀô̆ đô̆i tơ̆ tơring sơlam hăm tĕh đak boăl Lào kơ ƀar apŭng Đak Glei hăm Ngŏk Hôi đei Jơnŭm vei lăng pôk rơ̆ih tĕh đak ăn asong pơgơ̆r pôk rơ̆ih hrôih mĭnh năr, ‘nŏh jing pơgơ̆r lơ̆m năr au, năr 22/5.

Hơnĭh tăh hla kơsô̆ 2 thhôn Đak Nơ̆, tơring Đak Nhoong, apŭng Đak Glei hơdrol năr pôk rơ̆ih hrôih

Lơ̆m năr pôk rơ̆ih hrôih năr 22/5, 6 tơring tơnap tap hlŏh đei 36 hơnĭh tăh hla hăm akŏp hlŏh 10.000 ‘nu bơngai tăh hla. Tơ̆ rim hơnĭh tăh hla hrôih kơ dêh char Kon Tum, atŭm hăm vei lăng sơđơ̆ng hơnĭh, tơmam drăm ăn bơ̆ jang pôk rơ̆ih, khŭl kơdră tơring păng rim hơnĭh bơ̆ jang hlôi jang ‘lơ̆ng tơdrong jang tang găn jĭ Covid-19.

Hơmet kơ ƀang tơbăt pơtho ăn bơngai tăh hla pơm kiơ̆ tang găn jĭ Covid-19

Hơdrol năr pôk rơ̆ih, kang ƀô̆, ƀok thây pơgang hlôi pruih pơgang pơlôch sơmach jĭ, hơmet pơ ‘lơ̆ng hơnĭh pơtŏ khăm yŭh akau jăn, kơ ƀang ming đak pơgang ôp ti, che gom ƀŏ păng hơmet hơnĭh ăn oei hơdrô̆ tơdăh đei ƀô̆h bơngai ayơ chĕp pơgrŭn, hiĕn, dui jơhngơ̆m ư̆h kơ hiôk lơ̆m jơ ‘năr vang năm tăh hla.

Tơblơ̆ nơ̆r: Amazưt