VOV4.Bahnar - Đơ̆ng blŭng sơnăm trŭh dang ei tơ̆ dêh char Kon Tum hlôi đei 15 ‘nu hơ iŏh glơ̆k kơ đak. Tơdrong hơ iŏh glơk đak roi lơ tŏk bŏk pơm ăn kơdră chĕp pơgơ̆r, hơnĭh bơ̆ jang tơring pơm hơdăh tơdrong tơm pơm ăn păng đei trong tang găn jơnei.

Hơlŭng đak mă 3 ‘nu hŏk tro lăm 5 tơ̆ tơring Hòa Bình lôch

Jô̆ đơ̆ng mă 3 ‘nu hŏk tro lăm 5B, hnam trương jăl Kơđĕh Nguyễn Bá Ngọc, tơring Hòa Bình, pơlei tơm Kon Tum glơ̆k đak vă jê̆ mĭnh khei kơ au, mă lei ƀok Đinh Công Hoàng, Bí thư Chi bộ jang hloi kơdră chĕp pơgơ̆r thôn 5 oei hiơ̆r lơ̆m jơhngơ̆m đĕch. Ƀok Hoàng tơroi, đak mă 3 ‘nu mon lôch glơ̆k kơđak ‘nŏh mĭnh sơlŭng tơ̆ jơ̆ng đak kơtăh pơchŏh đak kơ pơnơ̆t đak Ia Băng. Dang ei rim ‘măng yak brĭh trong au, ba hơnơ̆ng blŏk tơdrong glơ̆k kơ đak ‘nŏh đĕch:“Lơ̆m mă nŏh đĭ drung kơsơ̆ bơih mă mơ hoal năm tơchă kon, tơchă đe mon. Mư̆h kơ tơ̆ng đe tơroi khan đe hăp chă ngôi tơ̆ groi ksu au, mư̆h năm trŭh tơ̆ au lăng ƀô̆h gre tang vang hăm hơbĕn ao đe hăơ hŭt tơ̆ bri ksu au kơna mă krao hơvơn lơ bơngai môch tơchă lơ̆m đak. Đak jrŭ lăp dang kŭl tăng đech mư̆h jur chă hơvơ̆ ‘nŏh ƀô̆h pơ đĭ 3 ‘nu đe mon hloi. Ba nhen lĕ kơtĕch jơhngơ̆m, pă gơ̆h vă pơma hiă mĭnh nơ̆r hloi”.

Tang măt kơdră tơring, khŭl jang năm ngôi hăm ŭnh hnam đei kon hơ ‘lơ̆p glơ̆k kơ đak

Jô̆ đơ̆ng mă blŭng sơnăm trŭh dang ei lơ̆m dêh char Kon Tum đei 15 ‘nu hơ iŏh glơ̆k kơ đak. Lơ̆m au pơlei tơm Kon Tum đei 8 ‘nu; apŭng Đak Glei 4 ‘nu; apŭng Đak Tô 2 ‘nu păng apŭng Đak Ha 1 ‘nu. Yan au ƀô̆h tơdrong tơm pơm ăn đe hơ iŏh gơ̆k kơ đak tơ̆ Kon Tum ‘nŏh kơ yuơ kon pơlei tim gan hlô̆h vao lơ̆m tơdrong tang găn glơ̆k đak ăn đe hơ iŏh; bơngai ‘lŏ kră tim gan vei lăng năng tông tơnăp păng găh lơ đe hơ iŏh ư̆h kơ băt glơi đak. Tơ̆ hơnăp tơdrong lơ̆m dêh char hơnơ̆ng đei hơ iŏh glơ̆k đak, ƀok Vũ Văn Đam, Kơ iĕng Kơdră chĕp pơgơ̆r Hơnĭh vei lăng năng tông hơ iŏh păng Hơtŏ hơnơ̆ng drŏ nglo drŏ kăn, găh Dơnŏ anĭh vei lăng Tơdrong jang - Bơngai rơka păng tơpôl dêh char Kon Tum tơbăt, hơnĭh au tŏk bŏk tơlĕch jang kơtang pơrô̆ pơrôp pơtho tơbăt păng jei jang tơgŭm ăn dêh char chĕp pơgơ̆r tơdrong jang au: “Nhôn atŏk kơtang hlŏh dơ̆ng bơ̆ jang pơrô̆ pơrôp pơtho tơbăt vă atŏk kơtang tơdrong hlŏh vao ăn ŭnh hnam, đe hơ iŏh păng pơ đĭ kon pơlei găh tơdrong vang vei lăng năng tông đe hơ iŏh lơ̆m tang găn glơ̆k đak. Dêh char hlôi chĭh pơtrŭh hla bơar pơrô̆ jang ăn Dơnŏ anĭh vei lăng kon pơlei rim apŭng, pơlei tơm kăl dăr lăng dơ̆ng dôm tơring đei hơboong thoong đak, dơnau đak mă tim mă đei pơ̆ng kơ ƀang tơbăt hli hlơt. Jei pơrô̆ pơrôp atŏk kơtang hlô̆h vao ăn kon pơlei adoi nhen rim tơngla dôm dơnau đak hli hlơt”.

Atŭm hăm bơ̆ jang pơrô̆ pơrôp pơtho tơbăt atŏk kơtang jơhngơ̆m đon hlô̆h vao lơ̆m tang găn glơ̆k đak ăn đe hơ iŏh, kơdră chĕp pơgơ̆r păntg hơnĭh jang găh au kơ dêh char Kon Tum tŏk bŏk atŏk kơtang bơ̆ jang pơtho glơi đak ăn đe hơ iŏh. Mă lei tơdrong jang au jei tim mă jơnei kơtang kơ yuơ lơ̆m dêh char đei tŏ sĕt dơnau đak pơtho glơi đak lơ̆m mă đĭ đăng rim dơnau glơi đak lơ̆m hnam trương kơ yuơ dơnŏ anĭh vei lăng pơtho pơhrăm vei lăng tă ư̆h kơ măh đei kon jên jang pơtho pơhrăm glơi.

Bơngai chĭh: Khoa Điềm

Tơblơ̆ nơ̆r: Amazưt