VOV4.Bahnar - Tơ̆ dêh char Kon Tum anih jang pơ gang tơ ring tŏk bŏk pơ jei hăm khei ‘năr vă đĭ khei 11 âu iŏk đei tơ drong hơ găt ƀet tôm vaccine COVID-19 ăn bơ ngai kơ pal 18 sơ năm. Ia Chim jĭ xăh tơ ter kơ pơ lei tơm Kon Tum. Lơ̆m xăh đei hloh 7.000 ‘nu đơ̆ng 18 sơ năm tơ̆ kơ pal hăm găh lơ ‘noh bơ ngai Jrai păng Bahnar.

Hnam pơ gang xăh Ia Chim tơ băt, vă iŏk đei tơ drong hơ găt truh đĭ khei 11 jang đang tơ drong ƀet tôm jrŭm vaccine bơ̆ng jĭ COVID-19 ăn grŭp bơ ngai đơ̆ng 18 sơ năm tơ̆ kơ pal, kŭm hăm vei sơ đơ̆ng găh tơ mam drăm ăn tơ drong jang ƀet bơ̆ng, Hnam pơ gang xăh oei jang hơ dai kơ jăp hăm khŭl kơ dră xăh jang kiơ̆ ‘lơ̆ng tơ drong tơ roi tơ băt, pơ lung vă kon pơ lei năm ƀet vaccine.

Vă tŭn hrĕnh đei ƀet vaccine bơ̆ng COVID-19, anih jang pơ gang dêh char Kon Tum tơ gŭm hơ met ăn bơ ngai jang prăt năr tơ̆ 111 hơ nih ƀet bơ̆ng dêh char. Hơ dai hăm ‘noh hơ tŏk hơ năp jang đơ̆ng hloh 2.800 grŭp jang tơ pôl lơ̆m tơ roi tơ băt, pơ tho kon pơ lei năm ƀet vaccine bơ̆ng jĭ.

Thuem: Tơ blơ̆