VOV4.Bahnar - Pơ gê ‘năr 28/12, tơ̆ Anih tơm pơ gơ̆r Khŭl linh dêh char Kon Tum, Khŭl pơ gơ̆r jang tơ chă, iŏk akŏm păng băt hơ dăh hơ năn kơ ting linh lôch dŏng teh đak dêh char Kon Tum pơ gơ̆r pơm Lêh ăn khŭl linh ăn kơ khŭl K53 năm bơ̆ jang tơ chă, iŏk akŏm kơ ting linh lôch dŏng teh đak pơ yan tŏ 2021-2022 tơ̆ 3 dêh char găh pơ băh kơ teh đak buăl Lào.

Kơ dră chĕp kơ̆l dêh char Kon Tum păng Kơ dră Anih tơm pơ gơ̆r Khŭl linh dêh char apĭnh jet gia pơ lung Khŭl Đội K53 hơ drol kơ năm bơ̆ jang hơ năp jang

 Khŭl K53 dêh char Kon Tum năm bơ̆ jang tơ chă, iŏk akŏm kơ ting linh lôch dŏng teh đak pơ yan tŏ 2021-2022 đei 30 ‘nu kang ƀô̆, khŭl linh kơ Anih tơm pơ gơ̆r Khŭl linh dêh char Kon Tum. Tơ ring tơ chă, iŏk akŏm kơ ting linh lôch dŏng teh đak đei băt hơ dăh tơ̆ 3 dêh char Attapư, SêKông păng Chămpasắc kơ teh đak Cộng hòa Dân chủ Nhân dân Lào. Khei ‘năr mă Khŭl K53 dêh char Kon Tum bơ̆ jang tơ chă, iŏk akŏm kơ ting linh lôch dŏng teh đak tơ̆ 3 dêh char kơ teh đak buăl tơ chĕng hơ drol đơ̆ng dang ei truh đĭ khei 5/2022.

Thuem: Tơ bơ̆