VOV4.Bahnar - Tơ̆ dêh char Kon Tum lơ̆m 24 jơ âu hei đei ‘mi tih truh tôch kơ tih, đak ‘mi đei đơ̆ng 80- 240mm păng khŭl kơ dră tơ ring hlôi chih iŏk mĭnh kơ sô̆ hiong răm. Pơ gê ‘năr  17/10, Anih vei lăng kon pơ lei dêh char Kon Tum đei hla ar kăl gơ̆ih kơ rim anih jang găh dêh char păng Anih vei lăng kon pơ lei 10 apŭng, pơ lei tơm kơ chăng tơ jră hăm ‘mi đak tih, đak lơ̆p, đak lŏk jroh păng teh hơ lih.

Gơng hơ neh tơ̆ đak krong Pô Kô tơ̆ thị trấn Đăk Glei, apŭng Đăk Glei đei hơ lih

Hiong răm blŭng a yua đơ̆ng ‘mi tih pơm ăn đei chih iŏk hăm trong nơ năm. Yua kơ ‘mi tih, đak tơ̆ dôm đak glung, đak krong tŏk kơ jung, tơ̆ apŭng Đăk Glei, mĭnh pôm gơng hơ neh găn klĕch đak krong Pô Kô tơ ƀưh thị trấn Đăk Glei hăm 2 pơ lei Đông Sông, Đông Thượng hlôi đei đak jroh.

Anih đak lơ̆p gơng tơ̆ trong mơ̆t tơ̆ xăh Đăk Pxi, apŭng Đăk Hà

Khŭl kơ dră tơ ring ăn hơ tâp kơ ƀang tơ roi tơ băt, ăn bơ ngai jang pơ tho kon pơ lei năm dăr klĕch gơng nai. Tơ drong ‘mi tih pơm ăn teh hơ lih jih trong hơ nhăk truh ưh kơ gơh yak vih vơ̆t kŭm đei ƀôh tơ̆ 1,2 jăl trong tơ̆ apŭng Kon Plông păng Tu Mơ Rông.

Thuem: Tơ blơ̆