VOV4.Bahnar - Tơ̆ dêh char Kon Tum tơ drong tơ roi tơ băt găh pôk rơih Kuô̆k hô̆i jăl XV păng Jơ nŭm pơ gơ̆r kon pơ lei jơ̆p tơ ring oei hơ tŏk tôch ai. Gơ nơm đơ̆ng lơ trong roi tơ băt kơ na kon pơ lei ƀônh iŏk đei nơ̆r roi tơ băt, hlôh vao hơ dăh ƀiơ̆ găh tơ drong gĭt kăl đơ̆ng pôk rơih kŭm nhen tơ drong gơ̆h jang, hơ năp jang đơ̆ng kơ dih hăm tơ drong gĭt kăl kơ hơ drĕch hơ drung âu.

Dôm năr ‘nâu năm truh tơ̆ đĭ đăng 84 pơ lei, kueng kơ phô̆ kơ 11 xăh, thĭ trơ̆n lơ̆m apŭng Đăk Hà tơ̆ yơ kŭm ƀôh kon pơ lei oei hue lăng truh năr chơt tih kơ hơ drĕch hơ drung, năr pôk rơih Kuô̆k hô̆i jăl XV păng Jơ nŭm pơ gơ̆r kon pơ lei jơ̆p tơ ring.

Tơ roi găh pôk rơih tơ̆ Trang mang roi tơ băt apŭng Đăk Hà

Yă Nguyễn Thị Thắm, Kơ dră Anih jŏh ayŏ kơ dŏ xaong-roi tơ băt apŭng Đăk Hà ăn tơ băt, lơ̆m tơ drong roi tơ băt ăn năr pôk rơih ‘măng mă âu, kŭm hăm dôm trong roi tơ băt thoi so, apŭng oei năng kăl, tưk tơ iung tơ drong tơ roi tơ băt hăm kơ măy kơ mŏk ‘nao, tơ gŭm ăn bơ ngai tăh hla păng kon pơ lei gơ̆h iŏk đei nơ̆r roi tơ băt kiơ̆ lơ trong:      

“Nhôn iŏk yoa kơ măy kơ mŏk ‘nao mư̆h bơ̆ jang roi tơ băt. Kon pơ lei gơ̆h mơ̆ng kơ tă lơ̆m điên thoăi kơ dih dôm nơ̆r tơ roi găh pôk rơih. Nhôn oei năng kăl truh trong roi tơ băt hăm Zalo, Facebook ‘nŏh jĭ trang kơ tơ̆ng ang Đăk Hà, Nơ̆r roi tơ băt Đăk Hà, Đăk Hà 24h. ‘Nŏh jĭ dôm trang yoa dôm anih jang kơ pal, dôm khul jang tơ roi tơ băt pơ jing păng vei lăng vă chă roi tơ băt ăn kon pơ lei”.  

Tơ roi găh pôk rơih kiơ̆ aloa radio tơ̆ apŭng Đăk Hà.

Chih hơ dăh tơ drong roi tơ băt găh pôk rơih jĭ tơ drong jang chinh trĭ gĭt kăl, khul kơ dră pơ gơ̆r kŭm hăm dôm anih jang kơ pal kơ apŭng Đăk Hà ‘măn tơ drong tơ rĕk tôch ai ăn tơ drong jang ‘nâu. Yă Phạm Thị Thương, Phŏ Kơ dră vei lăng kon pơ lei apŭng Đăk Hà, Phŏ Kơ dră Anih vei lăng pôk rơih apŭng ăn tơ băt, vă kon pơ lei gơ̆h iŏk đei nơ̆r roi tơ băt ƀônh hiôk, apŭng pơ gơ̆r roi tơ băt kiơ̆ rim tơ drong, rim khei ‘năr tôch rơ đăh păng tơ lĕch lơ trong roi tơ băt:

“Apŭng pơih lơ trang roi tơ băt lơ̆m radio, tivi kơ apŭng. Đang ‘nŏh chih tơ ƀôh lơ̆m Trang roi tơ băt điên tư, dôm trang mạng tơ pôl mă apŭng pơ jing. Dôm anih juăt jang tơ̆ xăh, thĭ trơ̆n ‘nŏh pơ gơ̆r năm tơ roi hăm gre păng tơ roi lơ̆m aloa radio tơ̆ tơ ring. Tơ roi kiơ̆ kơ ƀang điên tư, panô, ap phích... Atŭm hăm ‘nŏh apŭng oei pơ tho ăn rim kăn ƀô̆, bơ ngai jang kơ tĕh đak păng kon pơ lei hơ len năng tôm tơ drong vă băt hơ dăh dôm tơ drong hơ găt, kiơ̆ đơ̆ng nŏh bơ̆ jang ‘lơ̆ng tơ drong gơ̆h jang păng hơ năp athei jang đơ̆ng kơ dih, kơ dih kâu athei năm pôk rơih”.

Khul dăr hơ len, vei lăng tơ drong pôk rơih đơ̆ng Khul kơ dră chĕp kơ̆l Anih Trung ương MTTQ Việt Nam tơ chĕng ‘lơ̆ng tơ drong roi tơ băt găh pôk rơih tơ̆ apŭng Đăk Hà

Gơ nơm đei lơ trong roi tơ băt, dôm tơ drong tơ roi ƀônh hlôh, ƀônh ƀlŏk kơ na vă rim bơ ngai tăh hla păng kon pơ lei apŭng Đăk Hà băt hơ dăh ƀiơ̆ găh tơ drong pôk rơih, găh tơ drong gơ̆h jang, hơ năp jang đơ̆ng kơ dih lơ̆m tơ drong pôk rơih. Ƀok Trần Đình Vân, 72 sơ năm, hnam tơ̆ Kueng kơ phô̆ 7, thĭ trơ̆n Đăk Hà ăn tơ băt, tơ̆ kueng kơ phô̆ đe ƀok, bơ ngai tăh hla păng kon pơ lei băt hơ dăh tơ drong pôk rơih. Dôm năr âu kon pơ lei chă pơ nuh tôch hơ iă găh 8 ‘nu bơ ngai lĕch pơ jei pơm bơ ngai tang măt Kuô̆k hô̆i, 85 ‘nu bơ ngai lĕch pơ jei pơm bơ ngai tang măt Jơ nŭm pơ gơ̆r kon pơ lei dêh char, 58 ‘nu bơ ngai lĕch pơ jei pơm bơ ngai tang măt Jơ nŭm pơ gơ̆r kon pơ lei apŭng păng dôm bơ ngai lĕch pơ jei vă tang măt lơ̆m Jơ nŭm pơ gơ̆r kon pơ lei thĭ trơ̆n hai vă ‘năr 23/5 kơnh bơ̆ jang hơ năp jang kơ dih kiơ̆ đơ̆ng rim hla kơ phĭu:

“Sơ năm ‘nâu đei tơ drong tôch gĭt kăl ‘nŏh jĭ pôk rơih Kuô̆k hô̆i păng Jơ nŭm pơ gơ̆r kon pơ lei jơ̆p tơ ring. Nhôn oei xa tơ̆ tơ ring kơ na tôch tơ rĕk, chă răp mơ̆ng đe tơ roi kiơ̆ lơ trong, nhen: lơ̆m radio, tivi, hop akŏm kon pơ lei tơ̆ tơ ring oei xa, hŏk hôp chi ƀô̆, hŏk hôp khul bơ ngai kră. Đĭ đăng dôm tơ drong ‘nŏh, dôm jơ hŏk hôp ‘nŏh adoi đei roi tơ băt truh tơ drong pôk rơih Kuô̆k hô̆i păng Jơ nŭm pơ gơ̆r kon pơ lei jơ̆p tơ ring. Nhôn tôch lui gô rơih đei dôm bơ ngai rơ gei, đei jơ hngâm đon ‘lơ̆ng, đei kon pơ lei lui yom vă pơm bơ ngai tang măt”.

    Khoa Điềm: Chih

Dơ̆ng: Tơ blơ̆