VOV4.Bahnar - Tơ̆ hơ năp tơ drong jĭ COVID-19 đei ƀôh hrĕnh, ư̆h kơ ê, vă dkơ chăng tang găn jĭ, anih vei lăng kon pơ lei dêh char Kon Tum hlôi tơ chơ̆t pơ dơh rim tơ drong jang ư̆h kơ kăl đơ̆ng tŏk bŏk măng ‘năr 6/5. Kiơ̆ kơ ‘noh Anih vei lăng kon pơ lei dêh char Kon Tum athei rim anih jang găh dêh char; Anih vei lăng kon pơ lei 10 apŭng, pơ lei tơm đơ̆ng tŏk bŏk măng ‘năr 6/5 ư̆h kơ pơ gơ̆r tơ drong jang akŏm lơ bơ ngai ư̆h kơ kăl. Pơ dơ̆h ‘mơ̆i tơ drong jang rim hơ nih pơm tơ lĕch tĕch mơ dro ư̆h kơ kăl tơ pă, đei hơ mơt kơ tơ poh jĭ COVID-19 lơ.

Tơ roi tơ băt tang găn jĭ COVID-19 tơ̆ tơ ring kon pơ lei kon kông dêh charKon Tum

Hăm rim hơ nih tĕch mơ dro kăl nai gơ̆h ăn tĕch mơ dro mă athei pơm kiơ̆ tơ păt rim trong jang tang găn jĭ COVID-19, ư̆h kơ akŏm lơ bơ ngai. Pơm kiơ̆ tơ păt tơ drong gom muh măt, hơ len lăng yuh hơ kâu, ôp rơ goh ti hăm đak ôp ti hrĕnh dăh mă sơ ƀŏng... tơ̆ hơ nih tơ pôl păng rim anih jang. Anih vei lăng găh pơ tho pơ hrăm dêh char Kon Tum kŭm hlôi tơ chơ̆t hơ met ming năr pơ long hŏk ki II, sơ năm hŏk 2020-2021 ăn kơ rim jăl hŏk hrôih hloh 1 giĕng pơ têng hăm trong tơ lĕch jang ƀlŭng a.

Thuem: Tơ blơ̆