VOV4.Bahnar - Kơ sơ̆ ‘năr 29/7, Anih pơ gơ̆r tang găn jĭ COVID-19 dêh char Kon Tum đei tơ roi tơ băt găh tơ drong pơ jing 2 hơ nih asong đĕch đak xăng ăn kon pơ lei hao gre hon đak brŏk tơ̆ pơ lei đơ̆ng tơ ring jĭ rim dêh char găh pơ băh. Kiơ̆ kơ ‘noh, 2 hơ nih pơ dơh păng tơ gŭm đak xăng đĕch tơ̆ dêh char Kon Tum đei hơ met ăn tơ̆ 2 trong gre.

Tơ gŭm đĕch đak xăng ăn kon pơ lei tơ̆ hơ nih tĕch đak xăng đak dâu 124

Hăm trong gre 14- trong Hồ Chí Minh ‘noh tơ̆ Hơ nih tĕch đak xăng đak dâu 124, jăl trong Km1475, găh thôn Dục Nội, xăh Đăk Nông, apŭng Ngọc Hồi. hăm trong gre 24 ‘noh tơ̆ Hơ nih tĕch đak xăng đak dâu 118, jăl trong Km 117+237, găh thị trấn Măng Đen, apŭng Kon Plông. Đĭ đăng kon pơ lei hao gre hon đa brŏk tơ̆ pơ lei đơ̆ng tơ ring jĭ rim dêh char găh pơ băh, mư̆h truh 2 hơ nih pơ dơh ngôi âu, đei tơ gŭm đĕch 1 tong gre 2 kơ lich đak xăng păng đei yua dôm tơ drong pơ vih pơ văn ƀônh tơ̆ hơ nih tĕch mơ dro âu.

Bơ ngai jang kơ Hơ nih tĕch đak xăng đak dâu vei sơ đơ̆ng tang găn jĭ vang tơ gŭm kon pơ lei

Đei băt, Anih tĕch đak xăng đak dâu Kon Tum hlôi pơm kiơ̆ tơ drong tơ gŭm đak xăng ăn kon pơ lei brŏk đơ̆ng tơ ring jĭ tơ̆ 2 Hơ nih tĕch mơ dro âu đơ̆ng ‘năr 25/7. Hơ drô̆ ‘năr 29/7, 2 Hơ nih tĕch mơ dro kơ anih jang hlôi sơng iŏk 850 ‘nu kon pơ lei păng tơ gŭm đĕch đak xăng ăn kơ 390 tong gre hon đak.

Thuem: Tơ blơ̆