VOV4.Bahnar - Kơ sơ̆ 11/5, lơ̆m jơ hôp trư̆k tuyê̆n hăm 10 apŭng, plt kơ dêh char, ƀok Lê Ngọc Tuấn, Kơ dră vei lăng kon pơ lei dêh char, Kơ dră Anih pơ gơ̆r jang tang găn jĭ Covid-19 dêh char Kon Tum pơ ma hơ dăh, vă pơ ‘nhŏ tơ mam, pơm ‘lơ̆ng anih jang, anih oei xa ăn dôm bơ ngai jang lơ̆m khul tang găn jĭ Covid-19. 

Bơ ngai jang pơ gang khăm hơ len hơ yuh hơ kâu jăn bơ ngai mât tơ̆ dêh char Kon Tum kiơ̆ trong gre 14

Tơ̆ hơ năp tơ drong jĭ oei tôch hơ mơt, dêh char Kon Tum oei vei kơ jăp 4 anih gak, grŭp jang đơ̆ng lơ anih jang kơ pal tơ̆ 3 jăl trong đei: Trong gre 14, 24 păng 40B. Kŭm hăm ‘nŏh tơ̆ 2 trong sơ lam tĕh đak kơ jung hlŏh 292km tơ ter hăm Lào, Campuchia, Khul linh vei lăng tơ ring sơ lam jang hơ doi hăm Anih chĕp kơ̆l pơ gơ̆r khul linh dêh char vei kơ jăp 70 grŭp, anih gak tang găn jĭ Covid-19.

Chih hơ dăh tơ drong jang tang găn jĭ Covid-19 oei đunh, Kơ dră vei lăng kon pơ lei dêh char Kon Tum Lê Ngọc Tuấn athei dôm apŭng, plt iŏk yoa khul jang hlôi đei, atŭm hăm ‘nŏh răt hơ met tôm tơ mam, kơ măy kơ mŏk kăl vă pơm sơ đơ̆ng tơ̆ anih oei, anih jang ăn khul tang găn jĭ blŭng a. ‘Ngoăih kơ ‘nŏh oei asong ăn Kơ dră vei lăng kon pơ lei dôm apŭng, plt gơ̆h răt iŏk hơ drol, roi tơ băt đơ̆ng rŏng mă lei athei hơ tŏk tơ drong đei yoa păng gơ̆h iŏk yoa dơ̆ng tơ̆ ning mônh kơnh vă tang găn tơ dỏng jĭ tơ̆ tơ ring.

Dơ̆ng: Tơ blơ̆