VOV4.Bahnar -  Pơgê năr 28/4, tơ̆ pơlei tơm Kon Tum, Jơnŭm vei lăng kon pơlei dêh char Kon Tum jăl XI pơgơ̆r blŭng a hop akŏm pơtôch tơdrong jang jăl jang 2016-2021. Đơ̆ng blŭng jăl jang trŭh hơdrol ‘măng hop akom mă 12 pơtôch jăl jang, Jơnŭm vei lăng kon pơlei dêh char Kon Tum jăl XI hlôi pơgơ̆r đei 19 ‘măng hop akŏm, lơ̆m au đei 11 ‘măng hop akŏm joăt joe păng 9 ‘măng hop akŏm tơdrong kăl; Pơjing đei 299 Tơdrong tơchơ̆t ăn rim hơnĭh bơ̆ jang iung jang kiơ̆. Rim tơdrong tơchơ̆t kơ Jơnŭm vei lăng kon pơlei dêh char Kon Tum tơlĕch ăn tôch hơdăh ƀlep trong bơ̆ jang đơ̆ng Đảng, khôi luơ̆t Tĕh đak, ƀlep hăm yan au kơ tơring kơna tĕnh koăng jang kiơ̆ ƀlep đei hơnih mơdro sa, bơngai tăh hla păng kon pơlei lăp đon, tơgum djru.

Kơdră tang măt vang năm hop akŏm

Lơ̆m 2 năr pơgơ̆r hop akŏm ‘măng mă 12, Jơnŭm vei lăng kon pơlei dêh char Kon Tum jăl XI gô lăng hơlen 65 tơdrong, đei 14 hla bơar tơbăt tơdrong jang păng 51 hla bơar pơtrŭh ăn, tơdrong vă pơjing Tơdrong tơchơ̆t. Lơ̆m au lơ tơdrong hlôi sơng iŏk đei tơdrong lăng ba kơ jăp đơ̆ng bơngai tăh hla păng kon pơlei lơ̆m dêh char, nhen: Trong jang iŏk jên krao tơmơt hŏk pơhrăm rim jăl hŏk; Găh tơgŭm djru hơnĭh mơdro sa iĕ păng păh ai lơ̆m dêh char Kon Tum jăl  2021-2025; Tơchơ̆t trong jang tơmơ̆t jên jang, hơmet ming trong jang tơmơ̆t jên jang hăm mĭnh ƀar tơdrong vă jang găh Jơnŭm vei lăng kon pơlei dêh char gơ̆h xek tơlang.

Tơblơ̆ nơ̆r: Amazưt