VOV4.Bahnar - Kơ sơ̆ (3/10), khul đei vă jê̆ 1.300 ‘nu bơ ngai đơ̆ng dôm dêh char tơ ring đei jĭ găh Pơ băh hao gre hon đa vih tơ̆ pơ lei hlôi truh tơ̆ dêh char Kon Tum.

Khul gak tơ̆ Anih hơ len jĭ kơ sô̆ 1 Sao Mai pơm hla ar tơ gŭm ăn kon pơ lei yak vih tơ̆ pơ lei

Kơ tă ƀât anih gak hơ len jĭ kơ sô̆ 1 Sao Mai, găh xăh Hòa Bình, plt Kon Tum, ‘măng jang mât lĕch găh pơ băh kơ dêh char, dôm khul jang kơ pal tơ̆ âu pơ gơ̆r pơih trong vă tang găn jĭ COVID-19 păng tơ gŭm ăn kon pơ lei vih tơ̆ pơ lei. Tơ drong tơ roi đơ̆ng khul jang kơ pal tơ̆ anoh gak hơ len jĭ kơ sô̆ 1 Sao Mai, hơ drô̆ kơ sơ̆ ‘năr 3/10 đei 644 tŏ gre hon đa hăm vă jê̆ 1.300 ‘nu bơ ngai đơ̆ng dôm dêh char tơ ring đei jĭ găh Pơ băh vih truh tơ̆ Kon Tum.

Đơ̆ng rŏng hao gre kơ dâu trong hơ tăih rim bơ ngai lap ngăl

Kiơ̆ đơ̆ng hơ len năng đei 94 ‘nu kon pơ lei Kon Tum; 17 ‘nu kon pơ lei Quảng Ngãi păng vă jê̆ 1.200 ‘nu kon pơ lei dôm dêh char đơ̆ng Quảng Nam lĕch tơ̆ găh Tu. Vă pơm ‘lơ̆ng hăm tơ drong tang găn jĭ COVID-19 păng vei sơ đơ̆ng ăn kon pơ lei hao gre kơ dâu klĕch dêh char, Dơ nŏ anih vei lăng kon pơ lei plt Kon Tum krao akŏm 100 ‘nu kăn ƀô̆, bơ ngai jang lơ̆m dôm khul vă tang găn jĭ păng tơ gŭm ăn kon pơ lei.

Dơ̆ng: Tơ blơ̆