VOV4.Bahnar - Kơsơ̆ năr 8/11, tơ̆ pơlei tơm Kon Tum, Dơnŏ anĭh Đảng dêh char Kon Tum pơgơ̆r Pơm lê̆h pơtôch păng pôk ăn tơmam hơpăh ‘măng pơlong Tơmam hơpăh chĭh kơtơ̆ng ang găh tơ iung pơjing Đảng dêh char Kon Tum sơnăm 2021.

Pôk tơmam hơpăh A găh pơdăh Tivi ăn khŭl iŏk đei hơpăh

‘Măng mă blŭng pơgơ̆r, lăp đơ̆ng rŏng vă jê̆ 4 khei tơlĕch, Khŭl chĕp pơgơ̆r Pôk hơpăh Chĭh kơtơ̆ng ang găh tơ iung pơjing Đảng dêh char Kon Tum sơnăm 2021 sơng iŏk đei 168 ƀai chĭh đơ̆ng 150 ‘nu bơngai, khŭl chĭh đơ̆ng 17 tơring, hơnĭh bơ̆ jang păng khŭl ƀô̆ đô̆i kŏng ang lơ̆m dêh char vang pơlong. Lơ̆m rim ƀai chĭh pơtrŭh pơlong au đei 82 ƀai chĭh trŏ ƀlep hăm tơdrong pơkăp đei tơmnơ̆t lơ̆m ‘măng pơlong hơtuch. Kiơ̆ đơ̆ng Khŭl chĕp pơgơ̆r hơlen, đei ƀô̆h rim ƀai chĭh tơbăt hơdăh tôm tong tơdrong jang tơ iung pơjing Đảng. Jơnŭm chơ̆m ƀai pơlong drơ̆ng nơ̆r, pôk ăn Tơmam hơpăh C ăn 6 ƀai chĭh; Tơmam hơpăh B ăn 4 ƀai chĭh; Tơmam hơpăh A ăn 3 ƀai chĭh. Dôm ƀai chĭh iŏk đei tơmam hơpăh chĭh kơtơ̆ng ang găh tơ iung pơjing Đảng dêh char Kon Tum sơnăm 2021 gô pơtrŭh vang năm pơlong Tơmam hơpăh chĭh kơtơ̆ng ang lơ̆m tĕh đak găh Tơ iung pơjing Đảng (Tơmam hơpăh búa liềm vàng) ‘măng mă VI sơnăm 2021.

Tơblơ̆ nơ̆r: Amazưt