VOV4.Bahnar - Ƀlep ƀât tơ băt 41 sơ năm Năr bơ ngai jo jăn Việt Nam (18/4), pơ gê (15/4), tơ̆ plt Kon Tum, Jơ nŭm vei lăng đe hơ iŏh păng tơ gŭm ăn bơ ngai jo jăn dêh char Kon Tum pơ gơ̆r hop akŏm pôk pơ ư bơ ngai jo jăn đei đon adrin mât oei xa hơ dai hăm tơ pôl păng dôm bơ ngai jang tơ gŭm rơ gei ‘măng mă VI sơ năm 2021.

Hơ păh Hla ar hôn bơ nê ăn đe ŏh

Tơ̆ hop akŏm 100 ‘nu bơ ngai jo jăn rơ gei lơ̆m tơ drong hŏk pơ hrăm, jang xa, tĕch mơ dro, tơ gŭm ăn bơ ngai mơ mat tat nhen kơ dih kâu hlôi đei pôk pơ ư, hơ păh tơ mam. ‘Nâu jĭ dôm bơ ngai rơ gei lơ̆m kơ sô̆ hlŏh 6.200 ‘nu bơ ngai jơ jăn kơ dêh char Kon Tum đei đon adrin hơ met pơ ‘lơ̆ng mơ mat tat, sut pơ đĭ đon tơ chĕng hrơ mơ lou vă jang tŏk lơ̆m tơ drong arih.

Ƀlep ƀât ‘măng mă âu Dơ nŏ anih vei lăng kon pơ lei dêh char Kon Tum hơ păh Ƀăng khen ăn 1 khul păng 1 ‘nu bơ ngai jang rơ gei ‘lơ̆ng lơ̆m tơ drong tơ gŭm ăn tơ pôl; Jơ nŭm vei lăng đe hơ iŏh păng tơ gŭm ăn bơ ngai jo jăn dêh char Kon Tum hơ păh hla ar Hôn bơ nê ăn 18 ‘nu bơ ngai đei đon adrin mât hơ dai ‘lơ̆ng hăm tơ drong arih xa tơ pôl.

Dơ̆ng: Tơ blơ̆