VOV4.Bahnar -  Pơgê năr 14/7, tơ̆ pơxat ƀlŏk tơbăt kơ linh lôch dŏng teh đak dêh char Kon Tum, anih jang kơpal plei tơm, Hô̆i đŏng kon pơlei, Anih vei lăng kon pơlei, Anih jang Măt trâ̆n tôh kuôk Việt Nam plei tơm Kon Tum pơm lêh pơdong groong ƀŭ 2 kơting linh lôch dơ̆ng teh đak, lôch plang lơ̆m dôm tơdrong tơblăh ayăt xơ̆ 'nao đei chă kôch akŏm lơ̆m plei tơm.

Ƀar kơting linh âu đei Anih jang găh Linh plei tơm Kon Tum jang atŭm hăm Jơnŭm pơgơ̆r Linh xăh Ngọc Bay păng xăh Kroong chă akŏm lơ̆m dôm năr blŭng khei 7 đơ̆ng kon pơlei tơ̆ tơring chă tơroi tơbăt. Kơtơ̆ng ang Anih jang găh Linh plei tơm Kon Tum ăn tơbăt, kơting linh lôch dŏng teh đak đei chă ƀôh lơ̆m hơlŭng tơblăh. Tơmam oei đei noh hơbăn ao ƀô̆ đô̆i păng pơđĭ 2 linh lôchd ŏng teh đak âu tam mă băt hơdăh hơnăn, pơlei pơla. Lơ̆m tơdrong tơblăh Mih dŏng teh đak, lơ̆m tơring kơ plei tơm Kon Tum, dêh char Kon Tum jing kơdrăn tơblăh kơtang hloh. Hloh 46 xơnăm đơ̆ng rŏng kơ đei jơnei tơring pơbăh, rơngei teh đak, Đảng ƀô̆, jơnŭm pơgơ̆r tơring, khul kơpal păng kon pơlei plei tơm Kon Tum duh oei pơtoi chơ chă, xir akŏm dôm kơting linh lôch dŏng teh đak oei tam mă chă ƀôh tơ̆ kơdrăn tơblăh.

Lan chih păng pơre nơ̆r