VOV4.Bahnar - Lơ̆m khei ‘năr jĭ hơ buh COVID-19, tơ drong jang tĕch tơ lĕch tơ̆ teh đak đe kơ dêh char Kon Tum 9 khei âu ki oei pơ vei đei tŏk lơ yak hloh trong jang tơ lĕch ăn. Mă hơ dăh ‘noh lơ̆m 9 khei âu ki, akŏp kơ jă tĕch tơ lĕch tơ̆ teh đak đe kơ dêh char Kon Tum đei hloh 174 triệu USD, yak hloh trong tơ lĕch jang păng tŏk vă jê̆ 41% pơ têng hăm khei ‘nâu sơ năm hơ drol. Lơ̆m noh, kơ su ‘noh jĭ tơ mam tĕch tơ lĕch tơ̆ teh đak đe tơm kơ dêh char đei đơ̆ng 80-85% akŏp kơ sô̆ tĕch tơ lĕch tơ̆ teh đak đe. Kiơ̆ kơ Anih vei lăng kon pơ lei dêh char Kon Tum, mă đơ̆ng tơ ƀơ̆p lơ mơ mat tat yua đơ̆ng kơ nê̆ đơ̆ng jĭ COVID-19, mă lei truh đĭ khei 9 tĕch tơ lĕch tơ̆ teh đak đe kơ dêh char hlôi vă jê̆ iŏk đei trong tơ lĕch sơ năm.

Kon pơ lei Kon Tum chrek iŏk kơ tăk kơ su

Tơ drong hiôk ‘noh jĭ kơ jă kơ su dôm khei blŭng sơ năm tŏk vă jê̆ păh lăp 15-17% pơ têng hăm khei ‘nâu sơ năm sơ̆; Trung Quốc anih tĕch tơ lĕch tơ̆ teh đak đe tơm tŏk bŏk dar deh tơ iung ming dơ̆ng đơ̆ng rŏng jĭ COVID-19 kơ na tĕch pran. Lơ̆m dôm khei hơ tuch sơ năm tơ dra hơ drol tơ mam pơ truh kơ su tŏk bŏk tơ jur, anih jang ô tô apŭng plĕnh teh tơ iung ming păng mŭk drăm Trung Quốc tŏk ‘lơ̆ng kơ na hơ nơ̆ng pơm tơ drong hiôk ăn rim anih jang mơ dro sa kơ dêh char Kon Tum lơ̆m tĕch tơ lĕch tơ̆ teh đak đe tơ mam tơm âu.

Thuem: Tơ blơ̆