VOV4.Bahnar - Khei ‘năr âu ki yua đơ̆ng ‘mi tih pơ dui đunh pơm ăn lơ hơ nih tŏk bŏk jang găh Tơ drong jang pơm hơ met ming rim jăl trong kơ nê̆ lơ̆m Trong gre 24 jăl trong năm klĕch apŭng Kon Plông, dêh char Kon Tum đei hơ lih kơ tang. Tơ̆ hơ năp tơ drong ‘nâu, Anih vei lăng tơ drong jang păng rim anih jang iŏk jang tŏk bŏk hăt hot pơ gơ̆r hơ met pơ ‘lơ̆ng vă vei lăng sơ đơ̆ng trong nơ năm hai, tŭn hrĕnh tơ drong ‘mong dơ̆ng tơ drong đei pơm hiơ̆ yua đơ̆ng kơ nê̆ đơ̆ng ‘mi tih. Chih jô̆ hơ len đơ̆ng Anih vei lăng tơ drong jang ming man trong nơ năm Kon Tum lơ̆m trong gre 24 ăn ƀôh, tơ̆ hơ nih iŏk jang kơ sô̆ 4 păng kơ sô̆ 5 kơ jung hloh 24km trong năm klĕch apŭng Kon Plông đei 6 hơ nih teh hơ lih hăm akŏp kơ jă hiong răm dang 10 ti hlak jên.

Hơ len lăng 1 hơ ih teh hơ lih tơ̆ trong gre 24

Anih vei lăng trong nơ năm gre kơ dâu dêh char Kon Tum tơ băt, kŭm hăm tơ drong athei đơ̆ng rim anih jang iŏk jang pơ gơ̆r pơ dŭ hơ met teh tơ mo vă vei sơ đơ̆ng trong nơ năm tơ̆ trong gre 24, anih vei lăng kŭm hlôi băt hơ dăh găh kon jên hơ met pơ ‘lơ̆ng, hơ dai hăm ‘noh gô apĭnh Anih tơm vei lăng găh trong nơ năm gre kơ dâu ăn tơ plih trong jang pơm man jih trong tơ̆ 1,2 hơ nih vă kơ trong kơ jăp hloh dơ̆ng.

Thuem: Tơ blơ̆