VOV4.Bahnar - Kơ sơ̆ ‘năr 12/11, tơ̆ pơ lei tơm Kon Tum, Anih vei lăng găh jang pơ gang dêh char Kon Tum pơ gơ̆r jơ tơ ƀơ̆p muh măt, pôk pơ ư păng pơ jao Bằng khen đơ̆ng Kơ dră Anih vei lăng kon pơ lei dêh char Kon Tum ăn kơ 30 ‘nu y, ƀak si kơ dêh char jang đang tơ drong jang tơ gŭm dêh char Bình Dương tang găn jĭ COVID-19. Pơ ma tơ̆ jơ tơ ƀơ̆p muh măt, Ƀak si CKII Võ Văn Thanh, Kơ dră chĕp kơ̆l Anih vei lăng găh jang pơ gang dêh char Kon Tum pôk pơ ư jơ hngơ̆m đon iung jang tơ gŭm, ưh kơ ‘nhoen mơ mat tat, krê hơ mơt đơ̆ng 30 ‘nu y, ƀak si năm tơ̆ hơ nih jĭ dêh char Bình Dương tơ gŭm kŭm hăm bôl buăl jang hơ dai tang găn jĭ COVID-19.

Pơ jao Bằng khen đơ̆ng Anih vei lăng kon pơ lei dêh char Kon Tum ăn kơ y ƀak si vang jang tang găn jĭ COVID-19 tơ̆ dêh char Bình Dương

Kơ dră chĕp kơ̆l Anih vei lăng găh jang pơ gang dêh char Kon Tum tơ ƀôh đon ‘meh vă, lơ̆m khei ‘năr jĭ COVID-19 lơ̆m dêh char Kon Tum tŏk bŏk đei ƀôh krê hơ mơt, đe y ƀak si hơ tŏk dôm tơ drong hlôh vao gĭt đơ̆ng ‘măng vang jang tang găn jĭ tơ̆ dêh char Bình Dương tơ gop kŭm hăm anih jang pơ gang kơ dêh char tang găn jĭ hơ buh, vei lăng jơ hngơ̆m pran Kon pơ lei.

Thuem: Tơ blơ̆