VOV4.Bahnar - Tơ̆ hơ năp kơ tơ̆ng ang pơ lei tơm Hồ Chí Minh ư̆h kơ măh ‘nhot sa lơ̆m dôm năr kơ̆m yak vih vơ̆t lơ tang găn jĭ COVID-19, lơ kâu lak ƀô̆, khŭl, grŭp jang tơ gŭm yua kơ tơ pôl hăm kơ hrĕng ‘nu bơ ngai jang tơ̆ dêh char Kon Tum hlôi pơ gơ̆r pơ dŭ akŏm ‘nhot sa vă chơ tơ gŭm kon pơ lei pơ lei tơm.

            Đơ̆ng pơ gê hrôih, mŏ Nguyễn Thị Thảo Nguyên, Kơ dră vei lăng Kâu lak ƀô̆ pham tŏ tơ ring Kon Tum păng Tây Nguyên hlôi đei măt tơ̆ 1 pơ gar ‘nhot tơ̆ phường Nguyễn Trãi, pơ lei tơm Kon Tum. Mŏ Nguyên tơ băt ‘moi kiơ̆ mạng tơ pôl, băt tơ drong jang ‘lơ̆ng hơ iă đơ̆ng Kâu lak ƀô̆, tơ ‘ngla pơ gar ‘nhot tơ chă trong pơ ma dơ nuh tơ gŭm kâu lak ƀô̆ 2 kơ nong ‘nhot hla bey rơ goh. Tơ drong uơ oei dơ̆ng đơ̆ng rim bơ ngai jang lơ̆m kâu lak ƀô̆ ‘noh kăt iŏk chơ vih tơ̆ anih akŏm păng vei lăng vă ‘nhot hơ drih ‘lơ̆ng:

             “ ‘Nhot ƀlep khei ‘năr kăt tĕch, vei sơ đơ̆ng’nhot athei hơ drih, athei rơ goh. Chơ truh tơ̆ noh mă hư, ôm ‘noh rim ‘nu kŭm ư̆h kơ gơh sa ‘noh ‘mêm đĕch. Lu oh đei jang hơ dai hăm rim Kâu lak ƀô̆ tơ̆ apŭng vă pơm hơ nih sơng iŏk tơ mam tơ gŭm đơ̆ng rim ‘nu. Đơ̆ng rŏng ‘noh lu oh gô akŏm chơ vih tơ̆ 1 hơ nih tơ̆ pơ lei tơm Kon Tum păng đơ̆ng rŏng ‘noh ăn tăh tơ̆ gre chơ năm”.

            Jang hơ dai bơ̆ jang tơ drong jang tơ gŭm ‘nhot sa tơ gŭm kon pơ lei pơ lei tơm Hồ Chí Minh, rim kâu lak ƀô̆, khŭl, grŭp jang tơ gŭm yua kơ tơ pôl tơ̆  Kon Tum hlôi iŏk akŏm đei dang 10 tấn ‘nhot sa gơ̆ih asong ăn kon pơ lei pơ lei tơm. Hơ dai hăm dôm kơ loăi ‘nhot sa hloi, nhen hla ƀey, hla mơ lăng, hla lem jŭ... oei đei plui, tôl, tơh gơ̆h yua đunh năr hai. Tơ drong tôch kơ gĭt, tôch kơ hơ iă ‘noh jĭ tơ drong jang tơ gŭm ‘nhot sa tơ gŭm kon pơ lei pơ lei tơm Hồ Chí Minh tŏk bŏk đei lơ kon pơ lei tơ̆ dêh char Kon Tum jang kiơ̆. Mŏ Bùi Thị Tuyết Yên, hnam oei tơ̆ Tổ 2, phường Nguyễn Trãi, pơ lei tơm Kon Tum, đei pơ gar ‘nhot lem jŭ tĕch rim năr khŏm tơ gŭm pơ đĭ pơ gar ‘nhot kơ ŭnh hnam sư, tơ băt:

            “Hnam nhôn joăt pơ tăm ‘nhot lem jŭ, kĕ kăt đei dôm yơ ‘noh kăt đang kơ ‘noh nhôn tơ gŭm ăn rim bơ ngai lơ̆m noh. Đei lê̆ gre thoi noh đe oh năm ‘noh nhôn tơ gŭm dôm kon pơ lei oei tơ̆ ‘noh. 1 kơ nglat ƀơ̆t pơ ngot dang 1 tơ pu ƀơ̆t phĭ văi”.

Bơ ngai jang lơ̆m kâu lak bô̆ pham tŏ tơ ring Kon Tum păng Tây Nguyên kăt iŏk ‘nhot

            Kŭm hăm pơ gơ̆r iŏk akŏm ‘nhot sa đơ̆ng lơ anih tĕch tơm tơ̆ pơ lei tơm Kon Tum păng dôm apŭng nhen: Đăk Hà, Đăk Tô, Kon Plông... bơ ngai jang lơ̆m kâu lak ƀô̆ pham tŏ tơ ring Kon Tum păng Tây Nguyên, Ĭnh ‘mêm kơ Kon Tum, Grŭp Kon Tum… gô pơ gơ̆r klăih song, vei lăng vă chơ ‘nhot năm tơ̆ pơ lei tơm Hồ Chí Minh. ‘Nhŏng Trần Văn Cao Sang, Kơ dră Kâu lak ƀô̆ Ĭnh ‘mêm kơ Kon Tum tơ băt, trong jang chơ păng klăih song ‘nhot sa lơ̆m khei ‘năr jĭ COVID-19 kŭm hlôi đei jô̆ hơ len vei lăng sơ đơ̆ng ‘nhot sa truh tơ pang ti kon pơ lei pơ lei tơm hrĕnh hloh păng sơ đơ̆ng hloh:

            “Blŭng a trong jang thuê gre tih năm. Thuê gre ‘noh athei pơm hơ len lăng COVID-19. Nhôn pơ ma dơ nuh đei hăm Kâu lak ƀô̆ Khŭl, grŭp tơ̆ Gia Lai đe sư đei gre kơ dâu ư̆h kơ đei hoach jên. Nhôn chơ năm akŏm hăm đe sư. Oei hơ nih iŏk tơm ‘noh nhôn đei pơ ma dơ nuh hăm anih jang đoan pơ lei tơm Hồ Chí Minh păng dôm kâu lak ƀô̆ Khŭl, grŭp lơ̆m noh. Đe sư gô sơng iŏk tơ mam đơ̆ng nhôn vă đe sư ăn tơ̆ Hơ nih ăn oei hơ drô̆ păng dôm hơ nih tŏk bŏk pơ vang găn bơ̆ih”.

            Khoa Điềm: Chih

Thuem: Tơ blơ̆