VOV4.Bahnar - Tơ̆ dêh char Kon Tum, tơ drong tơ gŭm ăn bơ ngai jang, anih iŏk bơ ngai jang ƀơm kơ nê̆ yoa đơ̆ng jĭ COVID-19 kiơ̆ nơ̆r pơ tho đơ̆ng Khul kơ dră tĕh đak hơ nơ̆ng đei tơ lĕch păng bơ̆ jang trŏ bơ ngai kăl đei tơ gŭm. Jang kiơ̆ tơ drng tơ chơ̆t 68 păng Tơ drong tơ chơ̆t 23 đơ̆ng Khul kơ dră tĕh đak găh 1,2 tơ drong tơ gŭm ăn bơ ngai jang păng bơ ngai iŏk đe bơ̆ jang tơ ƀâp mơ mat tat yoa đơ̆ng jĭ COVID-19, truh dang ei vă jê̆ 880 anih tĕch mơ dro hăm hlŏh 16.000 ‘nu bơ ngai jang tơ̆ Kon Tum đei tơ gŭm hăm kơ sô̆ jên hlŏh 5,2 ti.

Anih iŏk bơ ngai jang truh pơm hla ar chih măt bơ ngai jang vă iŏk jên tơ gŭm đơ̆ng Ƀao hiêm hiong tơ drong jang tơ̆ Anih Ƀao hiêm tơ pôl dêh char Kon Tum

Kŭm hăm tơ gŭm ăn bơ ngai jang kiơ̆ tơ drong tơ chơ̆t 68 păng tơ drong tơ chơ̆t 23, bơ̆ jang kiơ̆ tơ dỏng tơ chơ̆t 116 đơ̆ng Khul kơ dră tĕh đak, dêh char Kon Tum đei hlŏh 17.000 ‘nu bơ ngai jang oei xa jên đơ̆ng Ƀao hiêm ưh đei tơ drong jang, tơ gŭm tŏ sĕt hlŏh ‘nŏh 1,8 triu hlak jên păng lơ hlŏh ‘nŏh 3,3 triu hlak jên 1 ‘nu. Truh tŏk bŏk khei 10 âu, đei hlŏh 1.800 ‘nu bơ ngai jang lơ̆m dêh char iŏk đei jên tơ gŭm vă jê̆ 4,6 ti đơ̆ng Anih mong jên tơ gŭm mưh hiong tơ drong jang.

Dơ̆ng: Tơ blơ̆