VOV4.Bahnar - Kơ tơ̆ng ang đơ̆ng Anih vei lăng kon pơ lei apŭng Ia H’Drai, dêh char Kon Tum tơ băt ‘mi tih, kial jăng đei grơ̆m glăih ‘nao âu hlôi pơm ăn hiong răm kơ tang tơ̆ tơ ring ‘nâu. Chih jô̆ blŭng a ăn ƀôh ‘mi tih, kial jăng pơm ăn 6 tŏ hnam kon pơ lei đei tơ glơ̆h pơ bŭng, hloh 2.600 tơ nơm ‘long kơ su đei glăih tăih păk, tơ gơ̆ jô̆ pơ hlom hiong răm hloh 1,2 ti hlak jên. Grơ̆m glăih kŭm pơm tơ gơ̆, păk 4 tŏ jrăng ŭnh điên, đŏng, hư 11 jrăng iĕ păng tơ lang tơ ley vă jê̆ 20 hơ nih pơm ư̆h kơ đei ŭnh điên 86 hơ nih biến áp pơm ăn pơ đĭ apŭng Ia H’Drai ư̆h kơ đei ŭnh điên.

Kŏng ti jang găh ŭnh điên Kon Tum hlôi akŏm bơ ngai jang găn rim hơ nih hư pơ truh ŭnh điên hơ tơ̆k dơ̆ng ăn kơ hloh 1.000 ŭnh hnam kon pơ lei. Anih vei lăng kon pơ lei apŭng Ia H’Drai hơ vơn khŭl jang pơ gơ̆r pơ dŭ hơ met ‘long păk tơ gơ̆ vei sơ đơ̆ng trong nơ năm; tơ gŭm kon pơ lei hơ met pơ ‘lơ̆ng hiong răm; hơ len lăng hơ nih, tơ mam tơ̆ dôm hơ nih pôk rơ̆ih; jang hơ dai hăm rim anih jang, anih jang mơ dro sa jô̆ hơ len hiong răm yua đơ̆ng grơ̆m glăih pơm ăn.

Thuem: Tơ blơ̆