VOV4.Bahnar - Lơ̆m vă jê̆ 357.000 ‘nu bơngai tăh hla dêh char Kon Tum năr dơning, nar 23/5 pơm kiơ̆ hơnăp kon pơlei, tơdrong pơm tơm kơ dĭh ‘moi kiơ̆ hla kơphĭu pôk rơ̆ih Kơdră tang măt Kuô̆k hô̆i jăl XV păng Jơnŭm vei lăng kon pơlei jăl jang 2021-2026, đei rơbau ‘nu bơngai tăh hla ‘nŏh bơngai đei pơmkon pơlei tĕh đak bơ̆n. Dôm bơngai tăh hla au sơ̆ erĭh sa nông nôt, tơ oei dĭh băl ư̆h kơ đei hla bơar tơchơ̆t đơ̆ng tĕh đak ăn oei lơ̆m tơring sơlam tĕh đak Việt Nam- Lào đei chĭh tơmơ̆t jing kon pơlei Việt Nam kiơ̆ tơdrong drơ̆ng minh nơ̆r ƀar Khŭl kơdră chĕp pơgơ̆r ƀar tĕh đak.

Hnam A Vơi hăm Y Quên hơtol hla kơ tĕh đak kơ kŭh chơt hơ iă Năr pôk rơ̆ih

Sa roi vă jê̆ truh năr pôk rơ̆ih kơdră tang măt Kuô̆k hô̆i jăl XV păng Jơnŭm vei lăng kon pơlei jăl jang 2021-2026, klo akăn ‘nhŏng A Vơi hăm mŏ Y Quên, hơdrung Jeh-Triêng oei lơ̆m pơlei Đak Si, tơring Đak Dŭk, apŭng Ngŏk Hôi sa roi chơt hơ iă ‘nă hal hlŏh dơ̆ng. Atŭm hăm tơdrong chă hơpuih hơmet pơ ‘lơ̆ng hnam oei, klo akăn ‘nhong jei hlôi iŏk hla kơ Tĕh đak ƀrông ‘nao năm hơtol tơ̆ ‘măng jang. Mŏ Y Quên tơbăt, klo akăn măr sư mĭnh hnơr jei 27 sơnăm, pơ đĭ măr đei mĕ ƀă chông ba đơ̆ng tĕh đak Lào mơ̆t oei tơ̆ pơlei Đak Si đơ̆ng oei ‘lơp. Sơnăm 2012, đei kang ƀô̆ tơring chă pơtho tơbăt ăn kơna pơ đĭ măr sư đei pơm hla bơar pơm kon pơlei Việt Nam đơ̆ng nŏh măr sư jing ŭnh om chom gŏ. Năr pôk rơ̆ih năr 23/5 au, klo akăn măr sư năm tăh hla ‘măng mă ƀar kơna tôch chơt hơ iă ‘nă hal:“ ‘Nau ‘măng mă ƀar ba năm tah hla. Klo akăn nhi chhôk dêh. Lơ̆m tim mă đei jing kon pơlei lơ̆m tĕh đak ƀô̆h rim bơngai năm tăh hla ‘nŏh ba tôch sơngon. Dôm năr au ki, thôn trơng păng kang ƀô̆ tơring jei jur tơ̆ au chă pơrô̆ pơtho tơbăt găh khôi luơ̆t pôk rơ̆ih, tơroi tơbăt găh bơngai đei hơnăn ăn pôk tơmơ̆t ăn kơ klo akăn măr nhi băt. Păng ba jei năm tơ̆ rông pơlei vă băt hơdăh hlŏh dơ̆ng. Pơđĭ klo akăn nhi tŏk bŏk chơt hơ iă gô chang trŭh năr pôk rơ̆ih au”.

Klo akăn A Vơi hăm Y Quên năm lăng hơlen kơtơ̆ng ang găh pôk rơ̆ih tơ̆ Rông pơlei

Lơ̆m năr pôk rơ̆ih năr 23/5 tơring sơlam tĕh đak Đak Dŭk, apŭng Ngŏk Hôi, dêh char Kon Tum đei 410 ‘nu bơngai tăh hla ‘nŏh dôm bơngai đei pơm kon pơlei Việt Nam đơ̆ng sơnăm 2009 trŭh sơnăm 2020. Dôm bơngai tăh hla au akŏm oei lơ lơ̆m 2 pơlei Đak Si hăm Đak Răng. Ƀok Bloong Keo, mĭnh ‘nu kon pơlei oei lơ̆m pơlei Đak Si tơbăt, đĭ đăng kon pơlei đei pơm kon pơlei Việt Nam hrei au hlôi đei tơdrong erĭh sa sơđơ̆ng, năm tăh hla ‘nŏh jing mĭnh tơdrong mă kon pơlei lăng tôch gĭt kăl vă tơ ƀô̆h hơdăh hơnăp jang kơ bơ̆n hăm pơlei pơla Việt Nam:“Mă blŭng ‘nŏh Đảng, Tĕh đak hlôi lăng ba kơ jăp pơvĭh pơvăn ăn kon pơlei đei hơnĭh oei sa sơđơ̆ng. Lơ̆m ‘nao brŏk sơ̆ hnam hiăh hiok dang ei ‘lơ̆ng liĕm bơih. Kon pơlei oei tơ̆ au pơm kiơ̆ ‘lơ̆ng tơdrong sơđơ̆ng. Rim tơdrong jang đơ̆ng Đảng, khôi luơ̆t Tĕh đak, kon pơlei jei pơm kiơ̆ ‘lơ̆ng ngăl. Kon pơlei đei pơm jing kon pơlei Việt Nam năm chĕp hla kơphĭu pôk rơ̆ih hloi”.

            Ƀok Phạm Hải Châu, Kơ iĕng Kơdră chĕp pơgơ̆r Đảng apŭng, Kơdră chĕp pơgơ̆r Dơnŏ anĭh vei lăng kon pơlei apŭng Ngŏk Hôi, dêh char Kon Tum tơbăt, vă tơgŭm ăn bơngai tăh hla bơngai pơm kon pơlei tĕh đak hlô̆h vao tôm sơnong jang, hơnăp jang kơ bơ̆n, khŭl kơdră chĕp pơgơ̆r atŭm hăm rim hơnĭh bơ̆ jang kơ apŭng đơ̆ng blŭng sơnăm 2021 trŭh dang ei hlôi jang kiơ̆ ‘lơ̆ng rim tơdrong bơ̆ jang pơrô̆, pơtho tơbăt trŭh rim ŭnh hnam, rim bơngai.Apŭng hlôi iung jang kiơ̆ khei ‘năr iung jang kăl hlŏh pơrô̆ pơrôp pơtho tơbăt găh pôk rơ̆ih, lơ̆m au mă kăl lăng kơ jăp hăm dôm bơngai tăh hla ‘nao đei pơm kon pơlei tĕh đak bơ̆n:“Bơngai jang pơrô̆ pơrôp păng khul kang ƀô̆ kơ pơlei năm trŭh rim ŭnh hnam au pơtho tơbăt hăm nơ̆r kon pơlei tơring ăn kon pơlei ‘nao mơ̆t pơm kon pơlei lơ̆m tĕh đak băt hơdăh găh khôi luơ̆t pôk rơ̆ih adoi nhen sơnong jang, hơnăp jang kơ kon pơlei Việt Nam mư̆h năm tăh hla pôk rơ̆ih Kuô̆k hô̆i păng Jơnŭm vei lăng kon pơlei rim hơnĭh. Hlŏh đơ̆ng chă pơrô̆ pơtho tơbăt tôch hơlen hăm rup, tơblang hơdăh kon pơlei hlô̆h vao păng tôch chhôk hơ iă ‘nă hal, lui kơ jăp lơ̆m tơdrong chĕp pơgơ̆r đơ̆ng Đảng jang kiơ̆ ‘lơ̆ng hơnăp jang pôk rơ̆ih kơ dĭh bơ̆n”.

Bơngai chĭh: KHoa Điềm

Tơblơ̆ nơ̆r: Amazưt