VOV4.Bahnar - Tơ̆ dêh char Kon Tum lơ̆m ‘năr 23/5, đei vă jê̆ 347.000 ‘nu bơ ngai tăh hla kơ dêh char năm tăh kơ phiê̆u pôk rơ̆ih lơ̆m Năr lêh tih kơ teh đak vă rơ̆ih bơ ngai gơ̆h hơ gei đei jơ hngơ̆m đon ‘lơ̆ng. Lêh pơ gơ̆r ‘măng pôk rơ̆ih tơ̆ 660 hơ nih tăh kơ phiê̆u lơ̆m dêh char đei pơ gơ̆r tơ păt, ‘lơ̆ng, ƀlep tơ drong hơ găt păng tơ ƀôh đei tơ drong chơt hơ iă Năr lêh pôk rơ̆ih đĭ đăng kon pơ lei. Tơ̆ rim hơ nih tăh kơ phiê̆u adoi đei khŭl jang pơ gang bơ̆ jang tơ drong jang tang găn jĭ COVID-19 păng kon pơ lei adoi pơm kiơ̆ ‘lơ̆ng nơ̆r tơ tă đơ̆ng kang ƀô̆ jang pơ gang.

Jang kiơ̆ tơ drong jang tang găn jĭ COVID-19 hơ drol kơ mơ̆t lơ̆m hơ nih tăh kơ phiê̆u pôk rơ̆ih

Đơ̆ng rŏng kơ tang măt ăn hloh 1.100 ‘nu bơ ngai tăh hla plei Kon Hra Chót, găh Hơ nih pôk rơ̆ih kơ sô̆ 6, phường Thống Nhất, pơ lei tơm Kon Tum tăh hla kơ phiê̆u pôk rơ̆ih mă blŭng lơ̆m kơ thŭng kơ phiê̆u, bơ ngai tăh hla A Huy chơt hơ iă tơ băt:

 “Kon pơ lei đunh kơ âu kŭm 2,3 năr bơ̆ih kon pơ lei ‘mĕh truh năr pôk rơ̆ih. Ĭnh jĭ kră pơ lei plei  Kon Hra Chót. Plei nhôn chhôk hơ iă rơ̆ih iŏk dôm bơ ngai tang măt Kuôk hô̆i, Jơ nŭm pơ gơ̆r kon pơ lei gơ̆h hơ gei. Tơ dăh bu đei pôk pơm lơ̆m Jơ nŭm pơ gơ̆r kon pơ lei, Kuôk hô̆i kŭm ‘mĕh ăn pơm liơ tơ gŭm ăn kon pơ lei.”

Mĭnh hơ nih pôk rơ̆ih tơ̆ pơ lei tơm Kon Tum

Lơ̆m năr pôk rơ̆ih bơ ngai tang măt Kuôk hô̆i jăl 15 păng bơ ngai tang măt Jơ nŭm pơ gơ̆r kon pơ lei rim tơ ring jăl jang 2021-2026, dêh char Kon Tum đei 2 Khŭl vei lăng pôk rơ̆ih tơ̆ hơ nih pôk rơ̆ih bơ ngai tang măt Kuôk hô̆i; 13 Khŭl pôk rơ̆ih tơ̆ rim hơ nih pôk rơ̆ih bơ ngai tang măt Jơ nŭm pơ gơ̆r kon pơ lei dêh char; 83 Khŭl pôk rơ̆ih bơ ngai tang măt Jơ nŭm vei lăng kon pơ lei rim apŭng păng 625 Khŭl pôk rơ̆ih tang măt bơ ngai tang măt Jơ nŭm vei lăng kon pơ lei rim xăh. Bơ ngai tăh hla dêh char Kon Tum gô rơ̆ih iŏk, pôk 6 ‘nu bơ ngai tang măt Kuôk hô̆i đơ̆ng 10 ‘nu lĕch pơ jei; pôk 50 ‘nu tang măt Jơ nŭm pơ gơ̆r kon pơ lei dêh char đơ̆ng 85 ‘nu lĕch pơ jei; pôk 316 ‘nu bơ ngai tang măt Jơ nŭm vei lăng kon pơ lei apŭng đơ̆ng 531 ‘nu lĕch pơ jei păng 2.132 ‘nu bơ ngai tang măt Jơ nŭm pơ gơ̆r kon pơ lei xăh đơ̆ng 3.607 ‘nu lĕch pơ jei

Thuem: Tơ blơ̆