VOV4.Bahnar - Lơ̆m dôm năr tơ jê̆ âu, dêh char Kon Tum hơ nơ̆ng đei bơ ngai jĭ F0 tơ pŏh tơ̆ anih oei hơ drô̆ păng lơ̆m tơ pôl. Tơ̆ hơ năp tơ drong ‘nâu, khul kơ dră pơ gơ̆r păng dôm anih jang kơ pal kơ dêh char hơ tŏk tơ drong vei lăng, tang găn tơ drong tơ pŏh đơ̆ng jĭ COVID-19.

Mĭnh anih hơ len năng jơ hngâm pran lơ̆m tơ pôl đơ̆ng rŏng kơ oei hơ drô̆ tơ̆ phương Lê Lợi, pơ lei tơm Kon Tum

Tơ̆ hop akŏm hăm khul chih hla ar tơ roi khei 10, đei Ban Tuyên giáo dêh char Kon Tum pơ gơ̆r ‘năr 28/10, ƀok Nguyễn Đình Cầu, Phŏ Chánh Văn phòng Dơ nŏ anih vei lăng kon pơ lei dêh char Kon Tum tơ roi, dêh char Kon Tum hơ nơ̆ng vei kơ jăp anih gak hơ len jĭ tơ̆ dôm jăl trong mât lơ̆m dêh char. Đon tơ chĕng đơ̆ng dêh char ‘nâu jĭ dôm anih gak hơ len jĭ mă ưh kơ sĭ anih gak vei lăng gre kơ dâu vih vât kơ na dêh char ưh kơ đei yuih hŭt kiơ̆ nơ̆r athei đơ̆ng Anih tơm vei lăng trong nơ năm. 

Ƀar năr âu ki tơ̆ Anih gak hơ len jên kơ sô̆ 1 Sao Mai, plt Kon Tum păng anih gak hơ len jĭ kơ sô̆ 2 krang Lò Xo, apŭng Đăk Glei tơ̆ trong Hồ Chí Minh đei ƀôh 3 ‘nu bơ ngai đei pơ rang jĭ SARS-CoV-2, lơ̆m nŏh đei 1 ‘nu bơ ngai đơ̆ng Hà Nội vih păng 2 ‘nu bơ ngai đơ̆ng Dak Lak truh. Tơ̆ hơ năp tơ drong kon pơ lei oei hơ drô̆ tôm năr, khăm hơ len jĭ tơ̆ hnam ‘nŏh ƀôh đei jĭ SARS-CoV-2 jing pơm ăn jĭ tơ pŏh lơ̆m tơ pôl, 1,2 apŭng, plt kơ dêh char Kon Tum tơ tă ăn kon pơ lei pơm hla ar apinh oei dơ̆ng tơ̆ anih oei hơ drô̆ 7 năr.

Truh dang ei dêh char Kon Tum đei 328 ‘nu bơ ngai jĭ COVID-19, lơ̆m nŏh đei 222 ‘nu bơ ngai ‘nao jĭ, 106 ‘nu bơ ngai tơ pŏh hơ lơ̆k dơ̆ng. Lơ̆m kơ sô̆ dôm bơ ngai jĭ âu đei 206 ‘nu bơ ngai đei tơ̆ anih oei hơ drô̆, 15 ‘nu bơ ngai tơ pŏh lơ̆m tơ pôl păng 1 ‘nu bơ ngai đei tơ̆ tơ ring pơ vang găn.

Dơ̆ng: Tơ blơ̆