VOV4.Bahnar - Năr 7/1, Kŏng ang dêh char dak Nông hlôi pơgơ̆r Hop akŏm pơtôch tơdrong jang sơnăm 2021 păng tơlĕch tơdrong jang sơnăm 2022. Tơbăt tơ̆ hop akŏm pơma hơdăh, sơnăm au ki, khŭl Kŏng ang Dak Nông hlôi tơgoăt mĭnh ƀơ̆r đon, hơdrin yak hlŏh tơnap tap, iung jang băt hơdăh rim tơdrong, tơlĕch jang kiơ̆ bơ̆ jang kŏng ang lơ̆m khei ‘năr trŏ lăp oei sa sơđơ̆ng, tang găn kĕ jĭ hơbŭh Covid-19.

Hăm dôm tơdrong iŏk đei jơnei, khŭl Kŏng ang Dak Nông hlôi đei Kơdră chĕp pơgơ̆r Tĕh đak pôk ăn Mê đai jang pran kơtang nuih mơng dơ̆ng mă ƀar ăn 1 khŭl, Mê đai jang pran kơtang nuih mơng dơ̆ng mă pêng ăn 1 ‘nu bơngai, Mê đai vei lăng tĕh đak dơ̆ng mă ƀar, dơ̆ng mă pêng ăn 11 ‘nu bơngai. Mă kăl ‘nau jing sơnăm mă 3 Kŏng ang dêh char Dak Nông hlôi đei Thủ tướng Tĕh đak pôk ăn Hla bơar hôn bơnê; sơnăm mă 4 hơnơ̆ng đei Dơnŏ anĭh tơm Kŏng ang pôk ăn Hla kơ pơting dĭh băl bơ̆ jang pran kơtang gơ̆h hơgei “Hơnĭh pơm jŭk yŭk trong hơlau lơ̆m tơdrong jang pơting dĭh băl Kơ yuơ sơđơ̆ng Tĕh đak”.

Tơblơ̆ nơ̆r: Amazưt