VOV4.Bahnar - Năr 5/1, Kŏng ang dêh char Gia Lai pơgơ̆r Hop akŏm pơtôch bơ̆ jang sơnăm 2021, tơlĕch tơdrong jang sơnăm 2022. Hơlen bơ̆ jang sơnăm 2021, Kŏng ang dêh char Gia Lai hlôi tơlĕch ‘lơ̆ng rim tơdrong jang, iung pơrăm tơdrong pơm glăi jơnei hlŏh 85,3%, tơdrong yoch kơtang ‘nŏh hlŏh  90,65%.

Thiếu tướng Rah Lan Lâm -Kơdră chĕp pơgơ̆r Kŏng ang dêh char Gia Lai iung pơma tơ̆ hop akŏm

Lơ̆m sơnăm, khŭl Kŏng ang hlôi rôp, chă hơvơn kŭp kơ̆l yơ̆r ti 116 ‘nu bơngai yoch kơtang, lơ̆m au 41 ‘nu bơngai yoch tôch hơmơt tơt; pơrăm hŭt lơ hơnĭh tĕch mơdro, chơ pơdŭ, iŏk yua ma tuý. Tơdrong sơđơ̆ng trong nơnăm hlôi jang ‘lơ̆ng pơm tơjur pơ đĭ 3 trong tơlĕch jang. Lơ̆m bơ̆ jang tang găn jĭ hơbŭh Covid-19, Kŏng ang dêh char Gia Lai hlôi hơvơn rơbau ‘nu kang ƀô̆ vang iung jang. Sơnăm 2022, kŏng ang Gia Lai akŏm tơlĕch jang rim trong jang vei lăng sơđơ̆ng; atŏk kơtang iung tơ jră tang găn khul yoch đơ̆ng tơring; pơrô̆ pơrôp, pơtho khan vă dă ƀiơ̆ đei tơdrong yoch; adoi hơnơ̆ng bơ̆ jang ‘lơ̆ng pơrô̆ pơrôp kon pơlei, vei lăng sơđơ̆ng kơ jăp ăn kon pơlei.

Tơblơ̆ nơ̆r: Amazưt