Lơ̆m 4 tơdrong jang Grŭp A, đei 2 tơdrong jang đơ̆ng dêh char Đắk Lắk. Gia Lai păng Lâm Đồng, 1 dêh char 1 tơdrong jang. Dôm tơdrong jang âu hue lăng truh tơdrong pơm tơlĕch tơmam xa rơgŏh ‘lơ̆ng, đei lơ kơchơ̆t bek đei pơm hăm  dôm tơmam đơ̆ng choh jang đei tơ̆ tơring; 1 tơdrong jang hơmet pơ ‘lơ̆ng kơđŏk sầu riêng pơm jing tơmam yoa kăp gĭt.

Pơma găh dôm tơdrong jang tơ̆ vŏng bán kết tơdrong thi Iung jang xa rơgŏh ‘lơ̆ng  tơring Tŏk bŏk – Tây Nguyên sơnăm ‘nâu, Khul châm hơlen ƀôh lơ khul thi đei trong jang ‘nao hăm dôm tơmam drăm tơ̆ tơring, tơplih đơ̆ng jang đei lơ tơmam jing tơgĕch iŏk dôm iă tơmam đei hŭt lê̆ vă pơm đei tơmam plơ̆ng dơ̆ng. Bơngai juăt jang găh mŭk drăm Phạm Chi Lan, kơdră tơgŭm ăn tơdrong thi akhan: dôm tơdrong vă jang đei tơƀôh trong jang hơdoi, tơgŭm băl mưh pơm hơtŏk kơjă tơmam, atŭm hăm ‘nŏh dar deh iŏk yoa kơmăy rơgŏh, tơplih hăm kơmăy sô̆ kiơ̆ dôm tơdrong tơchơ̆t ‘nao.